ئەرشیوی مانگی حەوتی ساڵی ٢٠٠٧ی ئاژانسی دەنگوباسی مانشێت/ ٣

ده‌گوترێ که ئیجلال قه‌وامی، ڕۆژنامه‌وانی کورد ده‌زگیر کراوه

مانشێت نیوز، سنه: ئیجلال قه‌وامی، ڕۆژنامه‌وانی کورد، پاش ئه‌وه‌ی بانگهێشتی دادگای گشتی و شۆڕشی ئیسلامی سنه ده‌کرێ، ده‌زگیر و ڕه‌وانه‌ی گرتووخانه کراوه.

«ئیجلال قه‌وامی» ڕۆژنامه‌وانی کورد و له ئه‌ندامانی ده‌سته‌ی نووسه‌ڕانی حه‌وته‌نامه‌ی په‌یامی مردم و دیدگا بووه و پاش ئاڵۆزیه‌کانی هاوینی ساڵی 84 له کوردستان به تۆمه‌تگه‌لێک وه‌کو سووکایه‌تی به ویلایه‌تی فه‌قیێ، به‌شداری له کۆبوونه‌وه‌ی نایاسایی و پڕۆپاگه‌نده دژی حکومه‌ت و بڵاوکردنه‌وه‌ی بابه‌تی دوور له ڕاستی ده‌زگیر و تا ئێستا چه‌ند جار دادگای کراوه و ئێستاش ده‌گوترێ که 3 ساڵ سزای زیندانه‌که‌ی په‌سه‌ند کراوه.

له‌م ڕۆژانه‌ی دوایی دا، زانرا که سزای سێ سال گیرانی قه‌وامی له لایه‌ن دادگای پێداچوونه‌وه‌ی ره‌ژیمه‌وه په‌سه‌ند کراوه‌، به‌لام ئه‌م یه‌که‌ به پارێزه‌ری ناوبراو «دوکتۆر نیعمه‌ت ئه‌حمه‌دی» ڕانه‌گه‌یاندراوه و پاشان ئیجلال قه‌وامی بانگهێستی دادگا کراوه و هه‌ر له‌وێوه‌ ڕاپێچی گرتووخانه کراوه.

تا ئێستا هیچ لایه‌نێکی فه‌رمی، چ پارێزه‌ری ئیجلال قه‌وامی و چ لایه‌نه پێوه‌ندی داره‌کانی تر، هه‌والی گیرانی ناوبراویان پشتڕاست نه‌کردۆته‌وه‌.

سێ مامۆستای گیراوی کامیارانی 10 مانگه ده‌ستبه‌سه‌رن و له ژێر ئه‌شکه‌نجه دان

مانشێت نیوز، کامیاران: «فه‌رزاد که‌مانگه‌ر»، «عه‌لی حه‌یده‌ریان» و «فه‌رهاد وه‌کیلی» مامۆستایانی کامیارانی ماوه‌ی 10 مانگه ده‌ستبه‌سه‌رن و تا ئێستاش به‌رده‌وام له گرتووخانه‌کانی کامیاران، کرماشان، سنه و ئێڤین دا ئه‌شکه‌نجه دراون و له ژووری تاکه‌که‌سی دا ڕاده‌گیرێن.

به گوێره‌ی زانیاریه‌کان، برایه‌کی «فه‌رزاد که‌مانگه‌ر» ئه‌ندامی پارتی ژیانی ئازادی کوردستانه و جگه له‌مه‌ش، دوو هه‌ڤالی تری مامۆستای فه‌رزاد که مانگه‌ر به ناوه‌کانی «عه‌لی حه‌یده‌ریان و فه‌رهاد وه‌کیلی» ماوه‌ی زیاتر له 10 مانگه ده‌ستبه‌سه‌ر کراون و له ژووری تاکه‌که‌سی دا ڕاگیراون و ڕه‌وشی تۆمه‌تباری و سزا و دادگایان نادیاره.

به گوێره‌ی ئاژانسی فورات، دایکی، فه‌رزاد که‌مانگه‌ر، مامۆستای کامیارانی، که له‌م 10 مانگه دا توانیویه‌تی ته‌نیا 5 خوله‌ک کوڕه‌که‌ی ببێنێ، باس له ئه‌شکه‌نجه درانی به‌ڕده‌وامی کوڕه‌که‌ی و هه‌ڤاله‌کانی گیراوی تری ده‌کات و ده‌لێ که له کاتی دیتنی دا لاق و ده‌ستی به شکاوی و جه‌سته‌ی به خوێناوی و ئازاره‌وه دیتووه.

هه‌روه‌ها له‌م ماوه دوور و درێژه دا ته‌نیا جارێک، ئه‌م سێ که‌سه بۆ دادگا بردراون و که‌مانگه‌ر جارێک و ئه‌ویس بۆ 5 خوله‌ک و بێ ئاماده‌بوونی پارێزه‌ر و توانای پاراستنی یاسایی خۆی دادگای کراوه و به‌ڵام ده‌گوترێ هه‌رسێک له‌ مامۆستاکان، به‌رخۆدانی بوێرانه‌یان له گرتووخانه‌کان دا کردووه.

به گوێره‌ی زانیاریه‌کان، فه‌رزاد که‌مانگه‌ر، عه‌لی حه‌یده‌ریان و فه‌‌رهاد وه‌کیلی، سه‌ره‌تا له گرتووخانه‌کانی کامیاران و کرماشان و پاشان له سنه و ئێستاش له ئێڤین له تاران ڕاگیراون و به‌رده‌وام له ژووری تاکه‌که‌سی و له ژێر ئه‌شکه‌نجه و گووشار دابوونه.

عوسمان بایده‌میر: پ.ک.ک ئۆپۆزیسۆنی چه‌کداری باکووری کوردستانه

مانشێت نیوز، بروکسه‌ل: شه‌ی ڕابردوو، «عوسمان بایده میر» و خه‌تیب دیجله، به‌شداری پرۆگرامێکی ڕۆژ‌ تی‌ڤی بوون و تێیدا بایده‌میر، پ.ک.ک‌ی‌ وه‌کو «ئۆپۆزیسۆنی چه‌کداری کورد» وه‌سف کرد.

شه‌وی ڕابردوو، عوسمان بایده‌میر، سه‌رۆکی شاره‌وانی مه‌نزی ئامه‌د، خه‌تیب دیجله، پارله‌مانتاری پێشووی پارتی ره‌نج و دێمۆکراسی، یوسف ئاڵاتاش، سه‌رۆکی پێشووی ڕێکخراوی مافی مرۆڤی تورکیا و مراد قه‌ره‌سو، له ڕێبه‌رانی پ.ک.ک(به ته‌له‌فۆن) به‌شداری پڕۆگرامێک له ستۆدیۆی که‌ناڵی ئاسمانی ڕۆژ تی‌ڤی بوون و نقاشی پرسه‌کانی ئێستای کوردستان و کێشه‌ی کورد و پ.ک.ک‌یان له تورکیا کرد و ئه‌م یه‌که‌ش له ناو مێدیاکانی تورکیاوه به توندی ده‌نگی داوه.

بایده‌میر له به‌شێک له وته‌کانی دا ده‌ڵێ: له ساڵی 199وه تا ئێستا گۆڕانکاری ستراتێژی زۆر له ناو «ئۆپۆزیسیۆنی چه‌کداری کوردی»(پ.ک.ک) دا هاتۆته ئاراوه و به شێوه‌یه‌ک که به‌ره‌وه ڕه‌وتی به‌سیاسی بوون ده‌چێت و ته‌نانه‌ت دۆخێکی خوڵقاند و گه‌ریلاکانیشی له ناو سنووره‌کانی تورکیا برده ده‌ر و ئه‌مانه‌ش بوون به هۆی ده‌سپێکی دیالۆگ و ڕه‌وتی به ئه‌ندامبوونی تورکیا له یه‌کێتی ئه‌ورووپا له ساڵی 199وه له هێلسینکی.

بایده‌میر هه‌روه‌ها ئاکه‌په‌ی به حیزبێکی بێ ئاگا و بێ داهاتوو وه‌سف کرد و وتی که «نازانێ که چ پۆلێتیکایه‌ک پێڕه‌و ده‌کات، ئه‌گه‌ر ئاکه‌په‌ و ئه‌ردۆغان، له ئالۆزیه‌کانی پێوه‌ست به ئاڵای مه‌رسین، ڕیسوایی شه‌مزینان، دژکرده‌وه‌ی به‌هێز و ژیرانه‌ی نیشان دابا و له سه‌ر لێدوانه‌کانی ئامه‌د و گه‌وه‌ڕی پابه‌ند با، کوده‌تای سه‌ربازی ئه‌له‌کترۆنی نه‌ده‌هاته ئاراوه. به‌ڕێز سه‌رۆک وه‌زیر دوێنێ پێرێ باسی له ناسنامه‌ی سه‌رو و هاوڵاتی ژماره یه‌ک و دوو ده‌کرد و ئه‌مجاره هه‌ر باس له یه‌ک ئاڵا و یه‌ک نه‌ته‌وه و یه‌ک تورکیا و یه‌ک… خه‌ریکه ده‌بێ به تاق».

خه‌تیب دیجله‌، ئه‌ندامی پێشووی پارله‌مانی تورکیا له پارتی کوردی ڕه‌نج و دێمۆکراسیش له قسه‌کانی دا، باسی له هه‌ڕه‌شه‌ی کوده‌تا ئامێزی ئه‌رته‌ش کرد و پاشان ئاماژه‌ی به میتینگه‌کانی کۆماری خوازی و یه‌کگرتوویش کرد و وتی که له‌م میتینگانه دا دروشمگه‌لێک وه‌کو «هاوڵاتی سه‌ر و خوارو نیه، چ کامه‌رانم من که ده‌ڵێم تورکم، ئێمه هه‌موومان که‌ماڵیستین، ئێمه هه‌موومان تورکین»، کۆمه‌ڵگای تووسی نیگه‌رانی کردووه. هه‌ر ئێستا سه‌رجه‌م ڕێکخراوه‌کانی حکومه‌ت له ژێر شوێندانانی ئه‌رته‌ش دان و هه‌موو هه‌وڵه‌کان دژ به کورد. دژکرده‌وه‌کانی که ئه‌رته‌ش له کۆمه‌ڵگا دژ به تیرۆری خواست، هه‌مووی بوونه‌ته‌ به‌ره‌نگار بوونه‌وه له‌گه‌ل کورد. سبه‌ی له شاره‌ مه‌زنه‌کان ئه‌م یه‌که‌ ده‌زانن که ده‌توانێ چ کێشه‌گه‌‌ل و قه‌یرانێکی کۆمه‌لایه‌تی و ئاسایشی بێنێته ئاراوه؟

ناوبراو سه‌باره‌ت به هێرشی چاوه‌ڕوانکراو بۆ باشووری کوردستانیش گوتی، مه‌گه‌ر به‌رپرسانی حکومه‌تی تورکیا شێت ببن، وه‌گه‌ر نا من هیچ ئاماده‌کاریه‌کی جیدی بۆ هێرش نابینم.

له کۆنسێرتێکی کوردان له به‌ریتانیا دا ڕێگه‌ به هه‌ڵکردنی ئاڵای کوردستان نه‌درا

مانشێت نیوز، له‌نده‌ن: ناوه‌ندی «فیۆ مۆنتانا»ی به‌ریتانی کۆنسێرتێکی موسیقای بۆ کوردان و تورکانی دانیشتووی باکووری له‌نده‌ن و به به‌شداری «شوان په‌روه‌ر، رۆژین، کۆما ئاگری ژیان، ئۆزله‌م ئۆزدیل» و کۆمه‌ڵێک هونه‌رمه‌ندی تر پێکهێنا و له میانه‌ی ڕێوره‌سمه‌که ڕێگه‌ به هه‌ڵکردنی ئاڵای کوردستان نه‌درا.

ئه‌م کۆنسێرته که به مه‌به‌ستی لێکنزیک کردنه‌وه‌ی دوو گه‌لی کورد و تورک له نێوان دانیشتوانی باکووری له‌نده‌ن و له » تاتێنهام گرین سه‌نته‌ر» پێکهات، به‌ڵام زۆربه‌ی ئاماده‌بوان کورد بوون سه‌ره‌ڕای ئه‌مه‌ش ڕێگه‌ به جه‌ند کورد نه‌درا که ده‌یانه‌ویست، ئاڵای کوردستان له ناو ئاهه‌نگه‌که‌ دا هه‌ڵده‌ن و گرژیه‌ک له نێوان پارێزڤانان و کورده‌کان هاته ئاراوه.

هونه‌رمه‌ندی ناسراوی کورد شوان په‌روه‌ر ڕه‌خنه‌ی له‌م هه‌ڵوێسته‌ی ڕێکخه‌رانی ڕێوره‌سمه‌که کرد و وتی: ئێره وڵاتێکی دێمۆپکراتیکه و زۆر ئاسایه که گه‌لێک بیهه‌وێ ئاڵای خۆی له کاتی جۆش و خرۆش و ئاهه‌نگێک دا هه‌ڵبدات و لێره‌ش دیاره که زۆرینه‌ی به‌شداران و ڕێژه‌ی له سه‌تا 99ی کوردن».

شوان په‌روه‌ر هه‌ر وه‌ها وتی: ئێمه کوردان ته‌نیا ولاتێکی دێمۆکراتیک و ئازادمان ده‌وێت و ئاماده‌ی برایه‌تی له‌گه‌ل تورکانین . ئێمه ته‌نانه‌ت له موسیقاش به زمانی تورکی گۆرانی ده‌ڵێن، به‌ڵام یه‌کێک له‌م تورکانه نه‌بووه که به زمانی ئێمه گۆرانی بلێت، ئه‌وه هیچ پێش به کوردی وتنی ئێمه‌ش ده‌گرن.

به گوێره‌ی فورات، کۆنسێرته‌که به شێوازی ڕاسته‌وخۆ له لایه‌ن که‌ناڵێکی تازه دامه‌زراوی تورکیا به ناوی «DEM TV» ده‌گوازراوه و هه‌ر که‌سانێکی سه‌ر به‌م که‌ناڵه بوون که به هۆی هه‌ندێک کێشه‌ که مومکینه به هۆی ئاڵای کوردستان له په‌خشی که‌ناڵه‌که‌یان له تورکیا بێته پێش، ڕێگه‌یان له هه‌ڵکردنی ئاڵای کوردستان گرتبوو وپاشانیش داوای لێبوردنیان کردبوو.

حدکا، ڕه‌وانه‌کردنی ئیمزای و مه‌یل ناشایست به ناوی ئه‌ندامانی ئه‌م حیزبه‌وه شه‌رمه‌ز‌ار ده‌کات

مانشێت نیوز، پاریس: ده‌فته‌ری نوێنه‌رایه‌تی حیزبی دێمۆکراتی کوردستانی ئێران، ناردنی ئی‌مه‌یل و به‌شداری له که‌مپه‌ینی ئیمزا به ناوی ئه‌ندامانی حیزب و به نووسینی وشه‌ و ڕسته‌ی ناشیرین و ناشایست به توندی ئیدانه و مه‌حکووم ده‌کات.

ماوه‌یه‌که هه‌ندێک که‌س یا لایه‌نی دیار ده‌ستیان داوه‌ته بڵاوکردنه‌وه‌ی مه‌یل و به‌شداری له که‌مپه‌ینه‌کانی کۆکردنه‌وه‌ی ئیمزا و تێیان دا به ناوی ئه‌ندامانی سه‌رکردایه‌تی حدکا، جنێو، قسه‌ی سووک و ناشایست ده‌نێرن و بۆ وێنه سێ که‌س له جێگه‌ی «مسته‌فا هیجری، سکرتێری گشتی حدکا، شاهۆ حوسێنی، نوێنه‌ری حدکا له ده‌ره‌وه‌ی وڵات و ڕه‌حیم ڕه‌شیدی، به‌رپرسی یه‌کێتی لاوان له ده‌ره‌وه‌ی وڵات»، به‌شداریان له که‌مپه‌ینی ئازادکردنی که‌بوودوه‌ند له ماڵپه‌ڕی Rmmk کردبوو و هه‌ندێک ڕه‌سته‌ی پر له سووکایه‌تیان تێدا نووسیبوو. ئه‌مه‌ش بوو به هۆی بڵاوکردنه‌وه‌ی ڕوونکردنه‌‌وه‌ی حدکا که ئه‌مه‌ش ده‌قه‌که‌یه‌تی:

ڕونکردنه‌وه‌یه‌ک له‌ ده‌فته‌ری نوێنه‌رایه‌تی حیزبی دێموکراتی کوردستانی ئێران له‌ ده‌ره‌وه‌ی وڵات

له‌و دواییانه‌ دا زانیمان که‌س یان که‌سانێک به‌ مه‌به‌ستی ئاژاوه‌گێری، به‌ نێوی که‌سانێک له‌ حیزبی دێموکراتی کوردستانی ئێرانه‌وه‌، به‌ ناونیشانی خه‌ڵکی دیکه‌ ئیمه‌یل ڕه‌وانه‌ ده‌که‌ن، یا له‌ ماڵپه‌ڕی دیکه‌ بۆ وێنه‌ سایتی «ئینسانیه‌ت» به‌ ناوی ئه‌ندامانی حیزبه‌وه‌ نێو و ئیمزا ده‌ده‌ن و له‌ هه‌مان کاتدا قسه‌ی ناشیرن و ناشایست ده‌نووسن بۆ ئه‌وه‌ی که‌سایه‌تی ئه‌ندامانی حیزب خه‌وشه‌ دار بکه‌ن.

هه‌رچه‌ند هه‌موو لایه‌ک له‌گه‌ڵ شێوه‌ی هه‌ڵسوکه‌وتی ئه‌ندامانی حیزب و ڕێزدانانیان بۆ خه‌ڵکانی دیکه‌ ئاشنان و ئه‌و جۆره‌ کاره‌ ناجایزانه‌ ناتوانن شوێن له‌ سه‌ر ناسیاوی خه‌ڵک له‌ سه‌ر ئه‌ندامانی حیزبی دابنێن، به‌و حاڵه‌ش به‌ پێویستی ده‌زانین هه‌موو لایه‌ک له‌و کرده‌وه‌ نه‌شیاوو که‌سایه‌تی شکێنانه‌یه‌ ئاگادار بکه‌ین و ئه‌وجۆره‌ ڕه‌فتاره‌ نادروسته‌ مه‌حکوم بکه‌ین.

ده‌فته‌ری نوێنه‌رایه‌تی حیزبی دێموکراتی کوردستانی ئێران له‌ ده‌ره‌وه‌ی وڵات

2007-07-09

ئه‌لقاعیده‌ وێڕای هه‌ڕه‌شه 2 مانگی مۆڵه‌ت به ئێران دا ده‌ستێوه‌ردانی کاروباری عێراق نه‌کات

مانشێت نیوز، به‌غدا: «عومه‌ر به‌غدادی» سه‌رۆکی «حکومه‌تی ئیسلامی عێراق»ی سه‌ر به ڕێکخراوی تیرۆریستی»ئه‌لقاعیده» هه‌ڕه‌شه‌ی له ئێران کردووه که چیتر پشتیوانی له ده‌وڵه‌تی شیعه‌ی عێراق نه‌کات و ده‌ستێوه‌ردانی کارباوری ناوخۆی ئه‌م وڵاته کۆتایی پێنێبێ.

به گوێره‌ی ئاژانسی فرانس پڕێس، ڕۆژی 17ی پووشپه‌ڕ، «عومه‌ر به‌غدادی» سه‌رۆکی حکومه‌تی ئیسلامی عێراقی سه‌ر به تۆڕی تیرۆریستی ئه‌لقاعیده، له په‌یامێکی ده‌نگی دا که له سه ر ماڵپه‌ڕێکی ئینته‌رنێتی بڵاوکرایه‌وه‌، هۆشداری به ئێران داوه که چیتر چ ڕاسته‌وخۆ و چ ناڕاسته‌وخۆ، به هیج شێوه، ده‌ست له کاروباری ناوخۆی عێراق وه‌رنه‌دات، پشتیوانی له حکومه‌تی شیعه‌ی ئه‌م وڵاته نه‌کات.

له په‌یامه‌‌که دا هاتووه که ئه‌لقاعیده‌ ، 4 ساڵه خۆی ئاماده و په‌روه‌رده ده‌کات و دوو مانگیان مۆڵه‌ت به‌م وڵاته داوه و ئه‌گه‌ر بێت و ئێران ده‌ست له‌م کارانه‌ی هه‌ڵنه‌گرێ، له هه‌ر شوێنێک، هێرش ده‌کرێته سه‌ر ئێرانیه‌کان و به‌م شێوه بۆ یه‌که‌م جار  له لایه‌ن ئه‌لقاعیده وه‌، هه‌ڕه‌شه‌ی ئاشکرا له ئێران ده‌کرێت.

به‌غدادی داوای له توجار و بازرگانانی عه‌ره‌بی سونه‌ و به تایبه‌ت له وڵاتانی که‌نداو کردووه که کۆتایی به مامه‌ڵه‌ کردن له‌گه‌ڵ ئێران بهێنن و داوای له سه‌ڕجه‌م سونه‌کانی جیهان و به تایبه‌ت سو‌نه‌کانی ئێران کردووه که خۆ بۆ به‌ره‌نگاری ئێران ئاماده‌بکه‌ن.

20 که‌س له کرماشان به تۆمه‌تی سیخوڕی ده‌زگیرکران

مانشێت نیوز، کرماشان: 20 هاوڵاتی له کرماشان که ده‌گوترێ که‌سانی بیانیشیان تێدایه، به تۆمه‌تی سیخوری بۆ وڵاتێکی بێگانه له لایه‌ن ئیتلاعاتی ئێرانه‌وه ده‌زگیر کران.

به گوێره‌ی ئاژانسی ئێرانی فارس، به‌رپرسی گشتی ئیداره‌ی ئیتلاعاتی پارێزگای کرماشان ڕایگه‌یاند 20 که‌س له شاری کرماشانی ڕۆژهه‌ڵاتی کوردستان که له ناویان دا، چه‌ند که‌سی بیانیشی تێدایه به تۆمه‌تی سیخوڕی بۆ وڵاتێکی بێگانه، له لایه‌ن هێزه‌کانی ئه‌منی و ئیتلاعاتیه‌وه ناسراو و پاشان ده‌زگیر کراون.

به گوێره‌ی هه‌واڵه‌که‌، ئه‌م که‌سانه گرووپێکی سیخوڕیان پێکهێناوه و له لایه‌ن سه‌رڤیسه‌کانی هه‌واڵگری ولاتانی ده‌ره‌کی پشتیوانی مالی و لۆژێستیکیان لێکراو و په‌روه‌ڕده‌ش بوونه و ئه‌رکیان کۆکردنه‌وه‌ی زانیاری نهێنی له سه‌ر ئامانجه‌ ئابووری، سیاسی و سه‌ربازی و کۆمه‌ڵایه‌تی ناوخۆی ئێران بووه.

به‌رپرسانی ئیتلاعاتی ڕاده‌گه‌یێنن که ئه‌م گیراوانه، به تۆمه‌تی سیخوڕی لێکۆڵینه‌وه‌ی یاسایی له‌باره‌یان دا ده‌کرێ و ڕاده‌ستی به‌رپرسانی دادوه‌ری ده‌کرێن.

هه‌روه‌ها که‌رمی، به‌رپرسی ده‌زگای ئیتلاعاتی ئێران له کرماشان ڕاشیگه‌یاند که 3 که‌سیان به تۆمه‌تی ئه‌ندامه‌تی پژاک و به 10 کیلۆ ته‌قه‌مه‌نیه‌وه‌، ده‌زگیرکردووه که ده‌ستیان هه‌بووه له ته‌قینه‌وه‌کانی بانه‌مه‌ڕی 85ی ئه‌م شاره له به‌ر ده‌رگای چه‌ند شوێنی ده‌وڵه‌تی که له ئاکامی دا برینداری لێکه‌وتبۆوه.

لاوانی مه‌هابادی خۆپێشاندانێکیان ساز کرد و ڕێز له 22ی پوشپه‌ڕیش ده‌گرن

مانشێت نیوز، مه‌هاباد: کۆمه‌ڵێک لاوی مه‌هابادی ڕایانگه‌یاندبوو که ڕۆژی 18ی پوشپه‌ڕ، به بۆنه‌ی دووهه‌مین ساڵوه‌گه‌ڕی کوژرانی لاوی مه‌هابادی «شوانه سه‌ید قادر» خۆپێشاندان ده‌که‌ن و دوێنێ ئێواره ئه‌م چالاکیه‌کان ئه‌نجام دا.

به گوێره‌ی زانیاریه‌کان لاوانی مه‌هابادی له کاتژمێر 6.5ی ئێواره‌ی دوێنێ دووشه‌ممه‌وه له مه‌یدانی شۆڕش ده‌ستیان به کۆبوونه‌وه و خۆپێشاندان کردوو و پاش ئه‌وه‌ی که هێزه‌کانی ئه‌منی ڕه‌ژیم له‌ مه‌یدانی شۆڕش ڕاواین ده‌نێن، لاوان به دروشم دان دژ به کۆماری ئیسلامی به‌ره‌وه فه‌له‌که‌ی شه‌هید شوانه ده‌که‌ونه‌ ڕێ و دروشمی شۆڕشگێرانه سه‌رده‌ده‌ن و ئاگرده‌که‌نه‌وه.

سه‌ره‌ڕای ئه‌وه‌ی که ماوه‌ی چه‌ند ڕۆژه، هێزه‌کانی ئه‌منی ڕه‌ژیمبه جلوبه‌رگی ئاساییه‌وه‌ و به له‌ده‌ست گرتنی بێ سیم هه‌وڵی چاوترسێن کردنی هاوڵاتیان و به تایبه‌ت لاوان له ناوچه‌ هه‌ستیاره‌کانی شار ده‌ده‌ن و به تایبه‌ت له مه‌یدانی شۆڕش و باخی شایه‌گان ئاماده‌بوونی ته‌واویان هه‌یه، به‌ڵام دیسانیش هاوڵاتیان له کاتژمێر 7ی ئێواره‌وه له شه‌غامه‌کانی «بوداق سوڵتان، نه‌بوه‌تی ڕۆژهه‌ڵات و ڕۆژئاوا» دوکانه‌کانیان داخست و زیاتر له 100 لاوی خۆپێشانده‌ریش، هێزه‌کانی ره‌ژیمیان له‌م شوێنانه به‌ردباران کرد و هژوومی چه‌کدارانی ده‌وله‌ت و ده‌ستوپێوه‌نده‌کانیان کرده‌وه.

وێبلاگی که‌ڵاش له‌مباره‌وه ده‌نووسێ که لاوان دروشمی » قاسملو، قاسملو، ڕێگات درێژه‌ی هه‌یه» و «بژی کاکه شوانه‌ی قاره‌مان»یان سه‌رده‌دا و  تا کاتژمێر 10ی شه‌و درێژه‌یان به چالاکیه‌‌که‌یان دان و له کۆتایش دا، ده‌گوترێ که لانی که‌م 10 که‌س تا ئێستا ده‌ستبه‌سه‌ر کراوه، به‌ڵام لاوان سوورن که یادی 22ی پوشپه‌ر ساڵڕۆژی تیرۆری «دوکتۆر عه‌بدولڕه‌حمان قاسملوو» ڕێبه‌ری حیزبی دێمۆکراتی کوردستانی ئێرانیش بکه‌نه‌وه و سه‌رهه‌لدان و خۆپێشاندانی جه‌ماوه‌ری پێک بێنن.

زێباری: 140 هه‌زار عه‌سکه‌ری تورک له سه‌ر سنووره‌کانی کوردستانه

مانشێت نیوز، به‌غدا: هۆشیار زێباری، وه‌زیری ده‌ره‌وه‌ی عێراق ڕایگه‌یاند که به پێی زانیاریه‌کانی ئه‌م ولاته، ئه‌رته‌سی تورکیا 140 هه‌زار عه‌سکه‌ری له سنووره‌کانی کوردستان جێگیرکردووه و هه‌ر جه‌شنه هێرشێک پێشێل کردنی سه‌روه‌ری خاکی عێراقه.

ئاژانسه‌کانی هه‌واڵ له زاری هۆشیار زێباری، وه‌زیری ده‌ره‌وه‌ی عێراقه‌وه ڕایانگه‌یاند که ئه‌رته‌شی تورکیا 140 هه‌زار عه‌سکه‌ری له سه‌ر سنووره‌کانی کوردستان و به حاڵه‌تی ئاماده‌باش مۆڵ داوه. زێباری ده‌ڵێ که تا ئێستا پێوه‌ندیه‌کانمان له‌گه‌ڵ تورکیا باشه، به‌ڵام به پێی زانیاریه‌کانی ئێمه‌، ئه‌م 140 هه‌زار عه‌سکه‌ره‌، به‌م زوانه له سه‌ر سنوور ده‌مێننه‌وه و باسی له هه‌ڵه‌ی زه‌مانی تورکیا کرد و درێژه‌ی دا «له کاتێک دا که سه‌ربازانی عێراق له شه‌قام و کۆڵانه‌کانی به‌غدا شه‌ڕی تیرۆریسم ده‌که‌ن، ناتوانین که بچین و به گژ گه‌ریلاکانی پ.ک.ک‌ش دا بێینه‌وه».

زێباری هه‌روه‌ها وتی که هه‌ر چه‌شنه هێرشێکی سه‌ربازی پێشێلکردنی مافی سه‌روه‌ری حکومه‌تی عێراقه و ئێمه به هه‌موو شێوه دژایه‌تی خۆمان له‌گه‌ڵ هێرشی سه‌ربازی تورکیا بۆ عێراق ده‌ربڕیوه و دیسانیش هۆشداریمان به ئه‌نقه‌ره داوه که لازمه له ناو سنووره‌کانی وڵاتی خۆی به‌ره‌نگاری پ.ک.ک ببێته‌وه‌ و خاکی خۆی بپارێزێ نه‌ک له ناو خاکی وڵاتانی تروه‌وه و باشتره هه‌رچی زووتر تورکیا بگه‌ڕێته‌وه ناو ئه‌و میکانیزمه سێ قۆڵیه‌ی که له نێوان عێراق و ئه‌مریکا و تورکیا هه‌یه بۆ به‌ره‌نگاری پ.ک.ک.

ئه‌مریکا سه‌باره‌ت به ئه‌گه‌ری هێرشی تورکیا له‌گه‌ل زێباری هاوفکر نیه!

مانشێت نیوز، واشنتۆن: وه‌زاره‌تی ده‌ره‌وه‌ی ئه‌مریکا و وته بێژی کۆشکی سپی، بوونی هێزه‌کانی ئه‌رته‌شی تورکیان له سه‌ر سنووره‌کان به ئاسایی زانی و وتیان که له‌گه‌ڵ زێباری هاوفکرد نیه که مومکینه هێرش ڕوو بدات!

هۆشیار زێباری وه‌زیری ده‌ره‌وه‌ی عێراق، ڕایگه‌یاند که تورکیا به شێوه‌یه‌کی نائاسایی 140 هه‌زار عه‌سکه‌ری له سه‌ر سنووری کوردستان کۆکردۆته‌وه و مومکینه هێرشی کوردستان بکات و وته‌بێژی کۆشکی سپی «تۆنی سنۆ»ش وه‌ڵامی داوه که پ.ک.ک گرووپێکی تیرۆریستیه و بۆ ئێمه‌ش جێگه‌ی نیگه‌رانیه و تورکیاش له سه‌ر سنووره‌کانی خۆی به‌ڕ‌ه‌نگاری ده‌بێته‌وه و هێرش ناکاته عێراق.

وته‌بێژی وه‌زاره‌تی ده‌ره‌وه‌ی ئه‌مریکاش «شان مه‌ککۆڕمه‌ک» ڕایگه‌یاند که ئه‌م سنوور ته‌نینه‌ی هێزه‌کانی ئه‌رته‌شی تورکیا ئاساییه و بۆ به‌ره نگاربوونه‌وه‌ی پ.ک.ک له ناو سنووره‌کانی خۆیه‌تی و ئێمه له‌گه‌ڵ زێباری هاوفکر نین.

مه‌ککۆرمه‌ک وتی: ئه‌گه‌ر تماشای سنووری رۆژهه‌ڵاتی باشووری تورکیا له‌گه‌ل عێراق بکه‌ین ده‌بینین که سنوورێکی دوور و درێژه‌ و له سه‌ره‌تای به‌هاره‌وه، گه‌ریلاکانی پ.ک.ک له‌م سنووره‌وه دزه ده‌که‌نه ناو تورکیا و شه‌ڕ ساز ده‌که‌ن و ئه‌رته‌شی تورکیاش ئێستا له‌وێ ئاماده‌یه و پێشیان پپێده‌گرێ و ئه‌مه‌ش ئاساییه.

ئاژانسی ئاسشێته‌د پڕێس‌یش وێنه‌کانی ئاسمانی ناوچه‌کانی سنووری عێراق و کوردستانی له ڕێگه‌ سه‌ته‌لایه‌ته‌کانی ئه‌مریکیه‌وه لێکداوه‌ته‌وه و ڕایگه‌یاند که جموجۆڵێکی تایبه‌ت که نیشان بدات هێرشێک له ئارادایه نابینرێ و له لایه‌کی تریشه‌وه، «برایان ویتمه‌ن» وته‌بێژی پێنتاگۆن، باس له ئاسایی بوونی شه‌ڕی ئه‌رته‌ش له‌گه‌ڵ پ.ک.ک ده‌کات به‌ڵام پێویست به نوێکردنه‌وه‌یه که ئه مریکا دژ به هه‌ر چه‌شنه هێرشێکی ده‌ره‌وه‌ی سنوور و چوونی تورکیا بۆ ناو خاکی عێراقه.

عوسمان بایده‌میر و شاره‌داری شرناخ، دۆزیان له‌به‌رانبه‌ر دا کرایه‌وه

مانشێت نیوز، ئامه‌د: به هۆی به‌شداری «عوسمان بایده‌میر» له پرۆگرامێکی ڕۆژ تی‌ڤی و وتنی «ئۆپۆزیسۆنی جه‌کداری کورد» بۆ پ.ک.ک و هه‌ڕوه‌ها لێدوانی شاره‌داری شرناخ بۆ که‌ناڵی فرانس 24، سه‌باره‌ت به پشتیوانی له پ.ک.ک، دۆز له به‌رانبه‌ر هه‌ردوو شاره‌دااری کورد دا کرایه‌وه.

سه‌ردۆزگه‌ری کۆماری ئامه‌د، به تۆمه‌تی پرۆپاگه‌نده بۆ پ.ک.ک و به پێی یاساکانی دژ به تیرۆریسم، لێپرسینه‌وه‌یه‌ک سه‌باره‌ت به «عوسمان بایده‌میر» ده‌سپێده‌کات و داوای له پۆلیسی تورکیاش کردووه که فیلمی لێدوانه‌کانی بایده‌میر له ڕۆژ تی‌ڤی  دا، بخاته ده‌ستیان.

عوسمان بایده‌میر، له پ.ک.ک وه‌کو «ئۆپۆزیسیۆنی چه‌کداری کورد» ناوبردبوو و » کشانه‌وه‌ی ئه‌ودیوی سنووری پ.ک.ک به ڕه‌خساندنی ده‌رفه‌تی ئاشتی و ره‌وتی به ئه‌ندامبوونی تورکیا له یه‌کێتی ئه‌ورووپا وه‌سفکردبوو».

له لایه‌کی تره‌وه وه‌اره‌تی ناوخۆی تورکیا لێکۆلینه‌وه‌ی سه‌باره‌ت به‌ به‌شداری بایده‌میر له پڕۆگرامێکی رۆژ تی‌ڤی و لێدوانه‌کانی شاره‌داری شرناخ، ئه‌حمه‌د ئارتاک، لێکۆڵینه‌وه‌ی یاسایی ده‌سپێکرد، تا ئه‌گه‌ر تاوانێک بدیترێته‌وه له سه‌ر کاریان لابه‌رێ.

که‌ناڵی فرانس 24 دا، له ڕاپۆرتێک دا له سه‌ر زاری «ئه‌حمه‌د ئه‌رتاک» بڵاوی کردبۆوه که ناوبراو ده‌ڵێ پ.ک.ک پشتیوانی له خه‌ڵکی کورد و ئێمه ده‌کات و بۆیه‌ش کوردان و ئێمه‌ش لازمه که پشتیوانی لێبکه‌ین. به‌لام شاره‌داری شرناخ ده‌لێ، وه‌رگێرانه‌که به فه‌رانسه‌وی به هه‌ڵه‌ ڕووی داوه، چونکه ئه‌و ته‌نیا وتوویه‌تی «پ.ک.ک 20 ساڵه شه‌ڕ ده‌کات، ئێمه شه‌ڕ و خوێنمان ناوێ، به‌ڵام بۆ کوردان ئالتێرناتیڤێکی تر نیه، که‌س نایه‌وێ بمرێ، ئێمه هه‌موومان عه‌داله‌ت و دێمۆکراسیمان ده‌وێ» و «فرێدڕیک ئه‌ڵبێر» ڕێپۆرته‌ری فرانس 24یش ده‌ڵێ که «نه‌مده‌زانی شاره‌داری شرناخ له سه‌ر قسه‌کانی ڕاستگۆ نابێت».

ناوێکی تری فڕۆکه‌هه‌ڵگری ئه‌مریکا هاته که‌نداوی فارس

مانشێت نیوز، پێنتاگۆن: «براین ویتمه‌ن»، وته‌بێژی پێنتاگۆن به که‌نالی سی‌ئێن‌ئێن‌ی ئه‌م ولاته‌ی ڕاگه‌یاند که ناوی فڕۆکه‌ هه‌ڵگری «ئینتێرپڕایز» به‌ره‌وه که‌نداوی فارس ڕه‌وانه‌ کراوه و به‌م زوانه پێوه‌ست به‌م دوو ناوه‌ فڕۆکه‌هه‌ڵگره‌ی تر ده‌بێت که هه‌ر ئێستا له‌م ناوچه‌ن.

هێزی ده‌ریایی ئه‌مریکاش ئه‌مرۆ ڕایگه‌یاند که «ناوی فڕۆکه‌هه‌ڵگری ئینته‌ر پڕایز، به‌ره‌وه که‌نداوی فارس که‌وتۆته ڕێ، تا به‌ره‌نگاری ڕه‌فتاری دوژمنکارانه‌، تێکده‌رانه و توندی هه‌ندێک وڵاتی ناوچه ببێته‌وه» و هه‌روه‌ها پشتیوانی له هێزه‌کانی ئه‌مریکا له عێراق و ئه‌فغانستان بکات.

ئه‌رته‌شی ئه‌مریکا، جۆزه‌ردانی ڕابردوو مه‌زنترین مانۆڤری سه‌ربازی ده‌ریایی له که‌نداوی فارس به‌ڕێوه‌برد که تێیدا دوو ناوی فڕۆکه‌هه‌لگر، 9 ناوی شه ڕکه‌ر، 140 فڕۆکه‌ی شه‌رکه‌ر، 17 هه‌زار مه‌له‌وانی هێزی ده‌ریایی به‌شداریان تێداکردبوو و دیک چێنی، جێگری سه‌رکۆماری ئه‌مریکا ئه‌و کات له سه‌ر عه‌رشه‌ی ناوی فڕۆکه‌ هه‌لگره‌وه، هۆشداری به ئێران دابوو و باسی له‌وه کردبوو که ئه‌مریکا ئیزن نادات، ئێران چه‌کی ئه‌تۆمی به‌ده‌ست بهێنێت.

هه‌ر ئێستا، دوو ناوی فڕۆکه‌هه‌ڵگری «USS جان سی‌ ئستینز» و «نیمیته‌ز» له که‌نداوی فارسن و پاش هه‌ڕه‌شه‌ی جۆره‌دانی دیک چێنی له ئێران، ئه‌حمه‌دی نه‌ژادیش هۆشداری دابوو که ئه‌گه‌ر هه‌ر چه‌شنه هێرشێک بکرێته سه‌ر ئێران، سه‌رجه‌م به‌رژه‌وه‌ندیه‌کانی ئه‌مریکا له ناوچه‌که ده‌که‌وێته به‌ر هێرشی ئێران.

سه‌رۆکی ئیسلامگه‌راکانی مزگه‌وتی لال له ئیسلام ئاباد کوژرا

مانشێت نیوز، پاکستان: ئاژانسی ڕۆیته‌رز له زاری وته‌بێژی وه‌زاره‌تی ناوخۆی پاکستان ڕایگه‌یاند که «عه‌بدوڵڕه‌سید» غازی، سه‌رۆکی میلیتانه ئیسلامگه‌را تونداژۆ خوازانی مزگه‌وتی لال له ئیسلام ئاباد له کاتی خۆڕاده‌ستکردنی کوژراوه.

سه‌رچاوه‌که ده‌نووسێ که ئه‌رته‌شی پاکستان، پاش 6 ڕۆژ دۆرپێچ کردنی مزگه‌وته‌که‌، له ناوه‌ندی ئیسلام ئاباد، توانیویانه 80 که‌سی به‌دیل گیراو ڕزگار بکه‌ن که له لایه‌ن میلیتانه‌ تونداژۆخوازه‌کانه‌وه وه‌کو قه‌لغانی مرۆڤی که‌ڵکیان لێوه‌رده‌گیرا و هه‌روه‌ها 50 میلیتانی چه‌کدار و 8 سه‌ربازی پاکستانه له ئاکامی پێکدادانه‌کان دا کوژراون.

هێرشه‌که پاش شکه‌ستی گفتگۆکانی وه‌فدی حکومه‌تی پاکستان و «مه‌لا عه‌بدولڕه‌شید غازی» هاته ئاراوه که ناوبراو داوای گه‌ره‌نتی گیانی و ئاسایشی بۆ ئه‌م چه‌کداره بیانیانه ده‌خواست که له مزگه‌وته‌که‌ دا په‌نایان گرتبوو و 50 پیاو 30 ژنیان به‌دیل گرتبوو.

عه‌بدوڵڕه‌شید غازی» ڕێبه‌ری ئیسلامگه‌راکانی په‌ناگرتوو له مزگه‌وتی لالی ئیسلام ئاباد دا، پاش ئه‌وه‌ی که ویستی به هاوڕێی 4 که‌س له نیزێکانی خۆ ته‌سلیمی هێزه‌کانی ده‌وڵه‌ت بکات، کوژرا. دۆرپێچ کردن و شه‌ڕی نێوان ئه‌رته‌ش و میلیتانه چه‌کداره‌کانی ناو مزگه‌وتی په‌روه‌رده‌ی دینی لال پاش هێرشێکی مه‌لاکانی ئه‌م شوێنه بۆ سه‌ر بنکه‌یه‌کی پۆلیس، 6 ڕۆژ له‌مه‌وبه‌ر ده‌ستی پێکردبوو.

حکومه‌تی هه‌رێمی کوردستان تووشی که‌می بودجه‌یه و له ڕێگه‌‌چاره‌ ده‌گه‌ڕێ

مانشێت نیوز، هه‌ولێر:زانرا که حکومه‌تی هه‌رێمی کوردستان تووشی قه‌یرانی بودجه‌یه و بۆ چاره‌سه‌کردنیشی ده‌یه‌وێ وه‌زاره‌ته‌کان له 33وه بۆ 13 یا 17 که‌مبکاته‌وه،  سیسته‌می دوو مووچه‌یی هه‌لبگرێ و فه‌رمانبه‌رانی که‌م بکاته‌وه.

«جه‌مال عه‌بدوڵا» به‌رپرسی نووسینگه‌ی ڕاگه‌یاندنی جێگری سه‌رۆکایه‌تی حکومه‌تی هه‌رێمی کوردستان ئاشکرای کرد که حکومه‌تی هه‌رێم تووشی قه‌یرانی که‌می بودجه‌یه و کۆمه‌ڵێک پێشنیار کراوه تا که‌مبوونی بودجه‌که‌، جوبران بکرێته‌وه و له‌وانه‌ش که‌مکردنه‌وه‌ی وه‌زاره‌ته‌کان له 33وه بۆ 13 تا 17یه و دانی به‌مه‌ش دانا که ئه‌م کابینه به‌م وه‌زاره‌ته زۆره‌وه بۆ رازیکردنی هه‌موو لایه‌نه سیاسیه‌کان بووه و ئه‌مه‌ش ناتوانێ درێژه په‌یدا بکات.

ناوبراو هه‌روه‌ها به «ده‌نگه‌کانی عێراق»ی ڕاگه‌یاند که سیسته‌می دوومووچه‌ی هه‌لده‌‌گرن و فه‌رمانبه‌ران له وه‌زاره‌ته‌کاندا که‌م ده‌که‌نه‌وه به تایبه‌ت ئه‌مانه‌ی که به شێوه گرێبه‌ست و په‌یمانی مووچه‌خۆری حکومه‌تن.

هه‌روه‌ها گرێبه‌سته‌کانی کشتوکاڵی وه‌زیران و مووچه‌خۆرانی باڵا، ڕاده‌گیرێ، چونکه ناکرێ هه‌م وه‌زیر بن و هه‌میش جووتیار. به گوێره‌ی ئاماره‌کانی تا کاتی یه‌کگرتنه‌وه‌ی حکومه‌ته‌کانی سلێمانی و هه‌ولێر نیزێک به 1 میلیۆن و 100 هه‌زار فه‌رمانبه‌ر له کوردستان هه‌بووه و نێچیروان بارزانی، سه‌رۆکی حکومه‌تیش ده‌ڵێ که بودجه‌ی کوردستان له سه‌تا 17ی عێراقه و ئه‌مه‌ش جگه له هه‌ندێک خه‌رجی هاوبه‌سی سه‌ره‌کی وه‌ک کرینی ده‌رمان و کاره‌با و هتده که به‌غدا خۆی ده‌یدات.

که‌می بودجه‌ی حکومه‌ت پڕۆژه خزمه‌تگوزاری و ئابووریه‌کان تووسی دره‌نگی و دواکه‌وتن ده‌کات و 230ی پڕۆژه‌ی نیوه‌ته‌واوی ئێستای حکومه‌تی هه‌رێم له بواره‌کانی ئاوه‌دانکردنه‌وه و جێبه‌جێ کردن و خزمه‌تگوزاری و به‌رهه‌م هێنان هه‌یه که ئه‌گه‌ر که‌می بودجه بێته ئاراوه لانی که‌م 100 له‌م پڕۆژانه ڕاده‌وه‌ستن.

حدکا داوای کوژاندنه‌وه‌ی 3 خوله‌کی ڕووناکی ماڵه‌کان ده‌کات بۆ پڕۆتیستۆکردنی تیرۆری د.قاسملوو

مانشێت نیوز، کۆیه: حدکا داوا ده‌کات که به مه‌به‌ستی پڕۆتیستۆ کردنی تیرۆری «دوکتۆر عه‌بدولڕه‌حمان قاسملوو» ڕێبه‌ری ئه‌م حیزبه له لایه‌ن تیرۆریستانی کۆماری ئیسلامی، هاولاتیانی کوردستان بۆ ماوه‌ی 3 خوله‌ک و له کاتژمێر 10ی شه‌وی 22ی پووشپه‌ر، ڕووناکی ماله‌کان بکوژێننه‌وه و بێداری گه‌له‌که‌مان له ڕۆژهه‌ڵاتی کوردستان بسه‌لمێنن.

له داواکاریه‌ک دا که سه‌رچاوه‌یه‌کی نیوه‌ فه‌رمی حیزبی دێمۆکراتی کوردستانی ئێران (هه‌ڵۆی کوردستان) بڵاوی کردۆته‌وه و وێنه‌یه‌کیشی به ده‌ستی ئاژانسه‌که‌مان گه‌یشتووه، داوا له هاولاتیانی ڕۆژهه‌لاتی کوردستان ده‌کرێ که به کوژاندنه‌وه‌ی 3 خوله‌کی گڵۆپ و ڕووناکیه‌کانی مال، له کاتژمێر 10ی شه‌وی 22ی پووشپه‌ر و هاکات له‌گه‌ل تیرۆری دوکتۆر قاسملوو، ڕه‌ژێمی ئێران پڕۆتیستۆ و شه‌رمه‌زار بکه‌ن.

ئه‌مه‌ش ده‌قی داواکاریه‌که:

«شه‌هید دوكتور قاسملوو: باشترین پاداش بۆ شه‌هیدان درێژه‌پێدانی‌ رێگایانه‌ «

خه‌ڵكی‌ به‌شه‌رف‌و نیشتمانپه‌روه‌ری‌ كوردستان !

سه‌روه‌رانی‌ حه‌ماسه‌خوڵقێنی‌ مێژوو!

رێبوارانی‌ ئه‌مه‌گناسی‌ حیزبی‌ دێموكراتی‌ كوردستانی‌ ئێران‌و پشتیوانانی‌ هه‌میشه‌ ئاماده‌ له‌ مه‌ته‌رێزی‌ ئازادی‌‌و پڕ له‌ ترووسكایی‌ شه‌هیدان، قازی‌، قاسملوو‌و شه‌رفكه‌ندی‌ !

ئه‌مڕۆ كه‌ دێوی‌ دزێو‌و شوومی‌ ئاخووندی‌ پێی‌ وایه‌ كه‌ نه‌ته‌وه‌ی‌ وشیار‌و قاره‌مانپه‌روه‌ری‌ كورد به‌ تیرۆری‌ رێبه‌رانی‌ زانا‌و رۆڵه‌ بوێره‌كانی‌‌و ره‌خساندنی‌ فه‌زای‌ ترس‌و تۆقاندن له‌ خه‌وی‌ فه‌رامۆشی‌دا نغرۆ بوونه‌، وه‌رن له‌ سێبه‌ری‌ ئه‌وین‌و وه‌فاداری‌‌و رێزلێنان له‌ خه‌باتی‌ نه‌ته‌وایه‌تی‌، بێداربوونه‌وه‌مان به‌ شه‌وپه‌رستانی‌ تیرۆریست پیشان بده‌ین، تا ته‌نینه‌وه‌ی‌ ده‌نگی‌ بێداریمان گوێی‌ ئاخنراوی‌ دوژمنانی‌ شوناس‌و ئازادیمان بدڕێنێ‌‌و په‌یكه‌ره‌ی‌ حكومه‌تی‌ ره‌ش‌و تاریكیان بله‌رزێنێ‌ .

ده‌سا هه‌موومان پێكه‌وه‌ له‌ په‌یمان نوێكردنه‌وه‌ له‌گه‌ڵ‌ ئامانجه‌ به‌رزه‌كانی‌ رێبه‌ری‌ زانا‌و بلیمه‌ت‌و نه‌مری‌ نه‌ته‌وه‌ی‌ كورد، شه‌هید دوكتۆر عه‌بدولڕه‌حمان قاسملوو،‌و پیشاندانی‌ رق‌و بێزاری‌ له‌ تیرۆری‌ ناجوانمێرانه‌ی‌ رێبه‌ری‌ گه‌وره‌ی‌ نه‌ته‌وه‌كه‌مان به‌ ده‌ستی‌ دیپلۆمات تیرۆریسته‌كانی‌ كۆماری‌ ئیسلامی‌ ئێران، به‌ كوژاندنه‌وه‌ی‌ رووناكیی‌ ماڵه‌كانمان له‌ شه‌وی‌ هه‌ینی‌، رێكه‌وتی‌ 22ی‌ پووشپه‌ڕ، له‌ كاتژمێر 10ی‌ شه‌و بۆ ماوه‌ی‌ 3ی‌ خوله‌ك (ده‌قێقه‌)، بسه‌لمێنین كه‌ رێبوار‌و قوتابیی‌ راسته‌قینه‌ی‌ رێگه‌ی‌ پڕڕێبواری‌ ئه‌و مرۆڤه‌ مه‌زنه‌ین‌و ده‌بین .

حیزبی‌ دێموكراتی‌ كوردستانی‌ ئێران، حیزبی‌ شه‌هیدان قازی‌، قاسملوو‌و شه‌رفكه‌ندی‌ به‌ پتر له‌ 61 ساڵ‌ مێژینه‌ی‌ خه‌بات له‌ رێگه‌ی‌ ئامانجه‌ ئازادیخوازانه‌كانی‌ نه‌ته‌وه‌ی‌ كورد، شانازی‌ به‌ خۆی‌ ده‌كا، كه‌ پشتیوانی‌ مه‌زنی‌ جه‌ماوه‌ری‌ خه‌ڵكی‌ كوردستانی‌ له‌ گه‌ڵدایه‌‌و پشت ئه‌ستوور به‌و هێزه‌یه‌ .

سه‌رنووسه‌ر و خاوه‌نی حه‌وته‌نامه‌ی داخراوی ئاشتی بانگهێشتی دادگای سنه کران

مانشێت نیوز، سنه: «بارام وه‌له‌د به‌یگی» سه‌رنووسه‌ر و «بورهان له‌هونی» خاوه‌ن ئیمتیازی حه‌وته‌نامه‌ی داخراوی ئاشتی بانگهێشتی دادگای سنه کران.

به گوێره‌ی هه‌والنێری چاوه‌دێری مافی مرۆڤی کورد، بورهان له‌هوونی خاوه‌ن و بارام وه‌له‌د به‌یگی، خاوه‌نی حه‌وته‌نامه‌ی داخراوی ئاشتی، به مه‌به‌ستی به‌ڕێوه‌چوونی دادگایان بۆ ڕۆژی 25ی پووشپه‌ڕ، بانگهێشتی دادگای شۆڕشی ئیسلامی سنه‌ کران.

حه‌وته‌نامه‌ی ئاشتی، هاوینی سڵی 84 به هۆی بڵاوکردنه‌وه‌ی هه‌واڵ و بابه‌ت له سه‌ر ئالۆزیه‌کانی ئه‌و کاتی مه‌هاباد و کوردستان پاش کوژرانی شوانه سه‌ید قادر، لاوی مه‌هابادی و به شێوه‌یه‌کی هه‌ژێنه‌ر به هه‌وڵدان دژی ئاسایشی نه‌ته‌وه‌ی و بڵاوکردنه‌وه‌ی هه‌اڵی ناڕاست و شێواندنی بیروڕای گشتی، تۆمه‌تبار کرابوو.

هه‌مان سه‌رچاوه باس له ئازادبوونی «شاهۆ مه‌لیکی» گیراوی سه‌قزی له گرتووخانه‌ی ئه‌م شاره کرد که پاش ئالۆزیه‌کانی هاوینی دوو ساڵ له‌مه‌وبه‌ر ده‌زگیر و سالێک زیندانی کرابوو.

گیراوێکی مانگرتوو له خواردن له به‌‌سته‌ری مه‌رگ دایه

مانشێت نیوز، سنه: ناسر حه‌میدی، هاوڵاتی سنه‌یی که به تۆمه‌تی کوشتنی مرۆڤ به سزای ئیعدام مه‌حکووم کراوه، پاش 63 ڕۆژ مانگرتن له خواردن، بۆ نه‌خۆشخانه‌ی بیعسه‌تی سنه ڕاگوێزراوه.

کۆمیته‌ی ڕۆژهه‌لاتی ناوه‌ندی چاک، ڕایگه‌یاند که «ناسر حه‌میدی» هاوڵاتی سنه‌یی که به کوشتنی مرۆڤ له شه‌ڕێکی گشتی دا و له هاوینی 1384 تاوانبار ناسراوه و به سزای له‌سێداره‌دان مه‌حکووم کراوه. ناوبراو خۆی به بێ تاوان ده‌زانێ و خوازیاری پێداچوونه‌وه به سه‌ر دۆسیه‌که‌ی دایه و ده‌گوترێ که دۆسیه‌که‌ی به‌ڵگه‌ی به‌م شێوه به‌هێز و سه‌لمێنه‌ری تێدا نیه که ببێته هۆی تاوانبار بوون و سزای له‌سێداره‌دانی.

که‌سی کوژراو کوڕی «ئه‌حمه‌د فه‌قێ سلێمانی»یه که به «ئه‌حمه‌و ئاسیه» ناسراوه و ده‌گوترێ که له چه‌کدارانی ده‌ستوپێوه‌ندی ڕه‌ژێمه و به زۆری گووشاریان خستۆته سه‌ر سیسته‌می قه‌زایی و هه‌ر بۆیه‌ش، دادگا سزای له‌سێداره‌دانی به ناسر داوه.

ناسر حه‌میدی، مه‌حکووم به له‌سێداره‌دانه‌ و به مه‌به‌ستی پڕۆتیستۆکردنی ناعادلانه بوونی سزاکه‌، مانی له‌خواردن گرتووه و ئێستاش پاش 63 ڕۆژ، ڕه‌وشی ته‌ندروستی تووشی کێشه‌ بووه و مه‌ترسی مردنی هه‌یه و بۆیه‌ش بۆ نه‌خۆشخانه‌ی بێعسه‌تی سنه ڕاگوازراوه.

یه‌کێتی خوێندکارانی دێمۆکراتی کوردستان، ده‌زگیرکردنی که‌بوودوه‌ند و قه‌وامی ئیدانه کرد

مانشێت نیوز، سنه: یه‌کێتی خوێندکارانی دێمۆکراتیکی کوردستان، له به‌یاننامه‌یه‌ک دا، ده‌زگیرکردنی محه‌ممه‌د سه‌دیق که‌بوودوه‌ند، سه‌رۆکی ڕ.م.م.ک و ئیجلال قه‌وامی رۆژنامه‌وانی به هه‌وڵێک بۆ پێش گرتن له ده‌ستپێڕاگه‌یشتنی ئازاد به زانیاری و رووداوه‌کانی پێویست بۆ کۆمه‌ڵگا و ڕۆژنامه‌وانی ئازاد زانی و ئیدانه‌ی کرد.

له به‌یاننامه‌ی یه‌کێتی خوێندکارانی دێمۆکراتی کوردستان دا هاتووه:

ڕۆڵی کۆمه‌ڵایه‌تی ڕۆژنامه‌وانان، به هۆی گه‌یاندنی زانیاری و ڕووداوه‌کان به شێوه‌ی ڕاسته‌قینه‌وه به کۆمه‌ڵگا، بڵاوکراوه‌کانی ئازاد و بیروڕای گشتی، ڕۆژ به ڕۆژ له په‌ره‌سه‌ندن دایه و ڕۆژنامه‌وان هه‌واڵ وه‌کو پێداویستیه‌کی کۆمه‌ڵایه‌تی له درێژایی ئه‌رکی کۆمه‌ڵایه‌تی سه‌رشانی خۆی و وه‌کو مافێک بۆ زانینی ڕاستیه‌کانی کۆمه‌لانی خه‌ڵکی ده‌زانێ و ئه‌مه‌ش پێویستی به ڕه‌وش و که‌ش و هه‌و‌ایه‌کی باش و بێ سنووردانان و پێشبه‌ستنی یاسایی و ئه‌منی هه‌یه و هه‌روه‌ها پێش گرتن به هه‌ڕه‌شه‌ی جه‌سته‌ی و گیانی له ڕۆژنامه‌وانان له ئاستی به‌یانی بیروڕا و زانیاریه‌کان، که له جارنامه‌کانی جیهانیش دا جه‌ختیان له سه‌ر کراوه‌ته‌وه.

به‌ڵام به‌ره‌نگاربوونه‌وه‌کانی ئه‌مدوایانه‌ی ده‌سه‌ڵاتداران له داخستنی ڕۆژنامه‌کان و ده‌زگیری ڕۆژنامه‌وانان نیشان ده‌دات که نه ته‌نیا هیچ میکانیزمێکی پشتیوانی بۆ ئه‌م توێژه له کۆمه‌ڵگا نه‌خراوه‌ته‌ به‌رچاو، به‌لکو ده‌سه‌ڵات ئاڵاهه‌ڵگری به‌ره‌نگاری و سه‌رکوتی رۆژنامه‌وانان و پێشێلکاری مافه‌کانی هاوڵاتیانه و له‌م ڕه‌وشه‌ش دا نه ته‌نیا بۆ ئه‌سلی ئازادی ڕامان وه‌کو مافێکی ئاسایی ڕۆژنامه‌وانان، بریندارکراوه، به‌ڵکو مافی هه‌موی کۆمه‌ڵگاش له ده‌سپێڕاگه‌یشتنی ئازادانه‌ی زانیاریه‌کان پێشێلکراوه.

ئێمه خوێندکارانی کورد، به‌ره‌نگاربوونه‌وه‌کانی ئه‌مدوایانه و ده‌زگیر و زیندانی کردنی «محه‌ممه‌د سه‌دیق که‌بوودوه‌ند» سه‌رۆکی ڕێکخراوی مافی مرۆڤی کوردستان و «ئیجلال قه‌وامی»، ڕۆژنامه‌‌وان و له ئه‌ندامانی شۆڕای ڕێبه‌ری ڕ.م.م.ک، به پێشێلکاری ئاشکرای مافی مرۆڤی کورد ده‌زانین و ده‌سه‌لاتداران و به تایبه‌ت ده‌زگای قه‌زایی به پابه‌ندبوون به ئازادیه‌کان و پارێزڤانی له مافی هاوڵاتیان و جارنامه‌کانی جیهانی مافه‌کانی مه‌ده‌نی، بانگهێشت ده‌که‌ین و خوازیاری ئازادکردنی هه‌رچی زووتری هه‌موو ڕۆژنامه‌وانان به تایبه‌ت ڕۆژنامه‌وانانی کوردی گیراو، قه‌وامی و که‌بوودوه‌ندین.

کۆمیته‌ی مافی مرۆڤی یه‌کێتی دێمۆکراتیکی خوێندکارانی  کورد له زانکۆکانی ئێران

20ی پووشپه‌ڕی 1386

گروه ضربتی «اینترپرایس» عازم خلیج فارس می شود

واشنگتن، 20 تیر، خبرگزاری «نووستی»/ دفتر مطبوعاتی نیروی دریایی آمریکا به «نووستی» اطلاع داد که گروه ناو هواپیمابر شماره 12 نیروی دریایی آمریکا متشکل از شش کشتی و یک زیردریایی به فرماندهی ناوهواپیما بر «اینترپرایس» به سمت خلیج فارس به حرکت درآمد.

در این گزارش آمده است: «.این گروه تحت فرماندهی «اینترپرایس» (CVN 65) همراه با اسکادران اول از پایگاه دریایی «نورفولک»در چارچوب پشتیبانی از جنگ فراگیر با تروریسم راهی هدف خود شد».

بر اساس این گزارش این دومین سفر مشابه «اینترپرایس» طی 14 ماه گذشته است. روز 18 نوامبر سال گذشته ناو هواپیما بر مذکور از اولین سفر خود باز گشته بود.

دریابان «کوین کاسگریف» فرمانده ناوگان پنجم نیروی دریایی آمریکا در بیانیه کتبی خود تاکید کرده است: «حضور «اینترپرایس» به نیروی دریایی آمریکا امکان مقابله با رفتار متجاوزانه، تخریب کننده و خشونت آمیز برخی از کشورها و همچنین حمایت از سربازان و تفنگداران دریایی ما در عراق و افغانستان را خواهد داد «.

این گروه ضربتی در کنار «اینترپرایس» و زیر دریایی تهاجمی «فیلادلفیا» از ناوچه های «فورست شرمان»، «جیمز ویلیامز»، آرلی بیوک» و «استاوت» و همچنین ناو موشک انداز «گتیس بورگ» و کشتی پشتیبانی «ساپلاین» تشکیل شده است. کلا در حدود 7,5 هزار نفر ملوان و تفنگدار دریایی در این گروه حضور دارند.

 ئیتلاعاتی مه‌هاباد هه‌ڕه‌شه‌ی دانه‌خستنی بازاڕی له هاوڵاتیان کردووه!

مانشێت نیوز، مه‌هاباد: به نزیکبوونه‌وه‌ی 22ی پووشپه‌ر، ساڵڕۆژی تیرۆری دوکتۆر قاسملوو، هێزه‌کانی ئه‌منی و ئیتلاعاتی مه‌هاباد هه‌ڕه‌شه‌یان کردووه که ئه‌گه‌ر هاوڵاتیان بازاره‌کان دابخه‌ن، سزایان ده‌ده‌ن.

له مه‌هاباده‌وه هه‌‌واڵمان پێگه‌یشت که هێزه‌کانی ئه‌ماکن و ئیلاعاتی مه‌هاباد داوایان له به‌رپرسانی «بازارچه‌ی شار» و «تاناکۆرای مه‌هاباد» کردووه که به هیچ شێوه و بیانوویه‌ک نابێ، بازاڕه‌کان له ڕۆژی هه‌ینی دابخه‌ن، وه‌گه‌ر نا سزا ده‌درێن.

به گوێره‌‌ی وێبلاگی که‌لاش، پاش بیستنی ئه‌م هه‌‌واڵه، بازاڕیان، هه‌ڕه‌شه‌کانی ئیتلاعات و هێزه‌کانی ئه‌منی ڕه‌ژیمیان ڕه‌تکردۆته‌وه و ڕایانگه‌یاندووه که «خیانه‌ت به خوێنی دوکتۆر قاسملوو ناکه‌ن و ڕۆژی هه‌ینی، 22ی پووشپه‌ر، دووکان و بازاره‌کان داده‌خه‌ن و ئاماده‌ هه‌ر چه‌شنه سزا و جه‌ریمه‌یه‌ک بده‌ن».

ده‌گوترێ ئه‌م هه‌ڵوێسته‌ی بازاڕیان، له ناو شار ده‌نگی داوه‌ته‌وه و بۆته مایه‌ی سه‌رنجی هاوڵاتیانی تری ئه‌م شاره و هه‌لوێسته‌که‌یان به کرده‌وه‌یه‌کی شۆڕشگێرانه له‌قه‌ڵه‌م داوه و پشتیوانی خۆیان لێده‌ربڕیوه.

کۆمه‌ڵێک له لاوانی مه‌هابادی ڕایانگه‌یاندووه که ڕۆژی 22ی پووشپه‌ر تیرۆری دوکتۆر قاسملوو له مه‌هاباد پڕۆتیستۆ ده‌که‌ن، حدکا داوای له هاولاتیان کردووه که شه‌وی 22ی پووشپه‌ر، کاتژمێر 10 بۆ ماوه‌ی 3 خوله‌ک ڕووناکیه‌کان بکوژێننه‌وه، هێزه‌کانی ره‌ژیم له ئاماده‌باشی ته‌واو دانه و چاوه‌ڕوان ده‌کرێ خۆپێشاندانی پڕۆتیستۆیی بێته ئاراوه.

بایده‌میر: لێدوانه‌کانم له ڕۆژ تی‌ڤی نوێ نین، 10 ساڵه هه‌وڵی ئیفاده‌ی خۆمان ده‌ده‌ین

مانشێت نیوز، ئامه‌د: عوسمان بایده‌میر، سه‌رۆکی شاره‌وانی مه‌نزی ئامه‌د، ڕایگه‌یاند که لێدوانه‌کانی له ڕۆژ تی‌ڤی شتێکی نوێ نیه و ئه‌و ماوه‌ی 10 ساله که له هه‌ر پلاتفۆڕمێک دا هه‌ولی داوه بیروڕای خۆی سه‌باره‌ت به کێشه‌ی کورد و پ.ک.ک باس بکات.

بایده‌میر وتی که لێدوانه‌کانم له رۆژ تی‌ڤی دا شتێکی تازه نیه و مافی خۆمه که به ئازادی بیروڕای خۆم باس بکه‌م و ماوه‌ی 10 ساڵیشه له هه‌ر پلاتفۆرم و ده‌رفه‌تێک دا جه‌ختم له سه‌ر کێشه‌ی کورد و پ.ک.ک (وه‌کو هێزێکی چه‌کداری ئۆپۆزیسیۆنی کوردی) کردووه، ئه‌مجاره‌، ڕه‌خنه گرتن له لێدوانه‌کانیشم مافێکی ئاسایی هه‌ر که‌سه، به‌ڵام کاتێک ڕێگه‌ی سیاسه‌ت داخرێ، ئه‌مجاره تفه‌نگه‌کان ده‌نگیان لێهه‌لده‌ستێ.

پاش ئه‌وه‌ی «عوسمان بایده‌میر» سه‌رۆکی شاره‌وانی ئامه‌د، به‌‌شداری پرۆگرامێکی ڕۆژ تی‌ڤی بوو و له‌ میانه‌ی پرۆگرامه‌که‌دا پ.ک.ک‌یی وه‌کو «ئۆپۆزیسۆنی چه‌کداری کورد»ی پێناسه‌کرد، له تورکیا، لێپرسینه‌وه‌یه‌کی وه‌زاره‌تی ناوخۆ و دۆزێکی یاسایی له‌به‌رانبه‌ڕ‌ دا کرایه‌وه و نقاشی مه‌زنی خسته ناو مێدیاکانی ئه‌م وڵاته و له هه‌موو لایه‌که‌وه هێرشیان کرده سه‌ر.

ناوبراو له‌مباره‌وه وتی که «پیرۆزه، وه‌زاره‌تی ناوخۆ ئه‌گه‌ر ئه‌وه‌نده‌ی له فکری من دایه، له‌گه‌ل وه‌زیر و به‌رپرسانی تر لێکۆڵینه‌وه‌ی کردبا، ئێستا ئامه‌د شارێکی تر بوو».

شایانی باسه که هه‌ر ئێستا 8 دۆزی کراوه‌ به‌رانبه‌ر به «عوسمان بایده‌میر» شاره‌داری مه‌زنی ئامه‌دی سه‌ر به پارتی کۆمه‌لگایی دێمۆکراتیک و سیاسه‌تڤانی کوردی باکوور، له جه‌ریان دایه و وه‌زاره‌تی ناوخۆش 15 لێپرسینه‌وه ی سه‌باره‌ت به‌ بایده‌میر له ده‌ستی لێکۆڵینه‌وه دایه و به گشتی تا ئێستا ته‌نیا له سێ سالی ڕابردوو دا زیاتر له 25 دۆز، لێکۆڵینه‌وه و لێپرسینه‌وه‌ی له‌گه‌ل کراوه.

سه‌رۆکی پارتی بزوتنه‌وه‌ی نه‌ته‌وه‌په‌رستی تورکیا: ده‌نگمان پێ بده‌ن تا ئاپۆ له‌سێداره بده‌ین

مانشێت نیوز، ئه‌نقه‌ره: «ده‌وڵه‌ت باخچه‌لی»، سه‌رۆکی پارتی بزووتنه‌وه‌ی نه‌ته‌وه‌په‌رستی تورکیا (MHP) له پڕۆگرامێکی ته‌له‌ڤزیۆنی دا وتی که هاوڵاتیان ده‌نگمان پێ بده‌ن، ده‌ستووری تورکیا ده‌گۆڕینه‌وه و ئۆجه‌لانی پێ له‌سێداره‌ ده‌ده‌ین.

پڕۆپاگه‌نده‌ی هه‌لبژاردنه‌کانی تورکیا بۆ پارله‌مان، بۆته مه‌یدانی سیاسه‌ت کردن له سه‌ر کێشه‌ی پ.ک.ک و له‌سێداره‌دان و نه‌دانی عه‌بدولا ئۆجه‌لان و له‌م نێوه‌ دا پارتی بزووتنه‌وه‌ی نه‌ته‌وه‌په‌رستی تورکیا MHP، ئیدعا ده‌کات که ئه‌گه‌ر بێت و هاوڵاتیان به ڕێژه‌ی زۆر و به‌م شێوه که بتوانن ده‌ستکاری یاساکانی ده‌ستوور بکه‌ن، ده‌نگیان پێ بده‌ن، ئه‌وه سزای له‌سێداره‌دان دێننه‌وه ناو یاساکان و «عه‌بدوڵا ئۆجه‌لان» ڕێبه‌ری گیراوی پ.ک.ک له سێداره‌ ده‌ده‌ن و بۆ به‌ره‌نگاری پ.ک.ک‌ش، هێرشی باشووری کوردستان ده‌ده‌ن.

ده‌وڵه‌ت باخچه‌لی، سه‌رۆکی پارتی ئۆڵترا نه‌ته‌وه‌‌په‌رستی MHP له پرۆگرامێکی ته‌له‌ڤزیۆنی که‌ناڵی «ب»ی تورکیا دا وتی که هاوڵاتیان ده‌نگمان پێ بده‌ن، ده‌زانین که چ له‌گه‌ڵ، ئاپۆ، به‌رپرسیاری مه‌رگی 30 هه‌زار که‌س له تورکیا و سه‌رۆکی پ.ک.ک ده‌که‌ین.

ئه‌وه له کاتێک دایه که ده‌وڵه‌ت باخچه‌لی خۆی و پارته‌که‌ی هاوپه‌یمانی پارتی دایکی نیشتمان به سه‌رۆکایه‌تی مه‌سعوود یه‌لماز و پارتی چه‌پی دێمۆکراتی ئه‌جه‌ویت، له کاتی لابردنی سزای له سێداره‌دانی ئۆجه‌لان بوو و «عه‌بدوڵا ئۆجه‌لان»یش به توندی سیاسه‌تکردن له سه‌ر ئه‌وی شه‌رمه‌زار کردووه.

هه‌په‌گه بیلانچۆی 6 مانگی ڕابردووی شه‌ڕ و پێکدادانه‌کانی ڕاگه‌یاند

مانشێت نیوز، به‌هدینان: هێزی پاراستنی گه‌ل، بیلانچۆی 6 مانگی ڕابردووی شه‌ڕ و پێکدادانه‌کانی نێوان گه‌ریلاکانی پ.ک.ک و ئه‌رته‌شی تورکیا دا ڕایگه‌یاند و به پێی ئاماره‌که، 34ی ئه‌فسه‌ر به گشتی له مانگی ژانڤیه‌وه 446 عه‌سکه‌ری تورکیا کوژراوه و 96 گه‌ریلاش گیانی له‌ده‌ست داوه.

ناوه‌ندی ڕاگه‌یاندن و چاپه‌مه‌نی هێزی پاراستنی گه‌ل (باڵی چه‌کداری پ.ک.ک) بیلانچۆی شه‌ڕ و پێکدادان و ڕێژه‌ی کوژراوانی 6 مانگی ڕابردووی گه‌ریلاکانی کورد و سه‌ربازانی ئه‌رته‌شی تورکیایی ڕاگه‌یاند و باس له‌مه‌ش ده‌کات که سه‌ره‌ڕای ئاگربه‌ستی یه‌کلایه‌نه‌ی 10 مانگه‌ی پ.ک.ک، ئه‌رته‌شی تورکیا 252 ئۆپێراسیۆنی پێکهێناوه و له‌ ئاکام دا 186 شه‌ڕ هاتۆته ئاراوه.

له‌م شه‌ڕانه‌ش دا، 3 ئه‌فسه‌ری پایه‌به‌رز و به گشتی 31 ئه‌فسه‌ر و 446 سه‌ربازی تورکیا کوژراون و 188 عه‌سکه‌ریش بریندار بوونه. به گوێره‌ ئاماره‌که به تایبه‌ت مانگه‌کانی مه‌ی و ژووئه‌ن، شه‌ر و پێکدادانی زۆر هاتۆته ئاراوه و ته‌نیا له مانگی ژوئه‌ن (حه‌زیران) دا، 51 شه‌ڕ پێش هاتووه و تێیدا 163 عه‌سکه‌ر کوژراوه.

هه‌ر له‌ ماوه‌ی ئه‌م 6 مانگه دا 1 هێلیکۆپته‌ر به‌ردراوه‌ته‌وه و 14 زرێپۆش و ئۆتۆمۆبیلی سه‌ربازی تێکشکاون و 9 واگۆنی شه‌مه‌نده‌فه‌ریش که به مه‌به‌ستی سه‌ربازی که‌لکیان لێوه‌رگرتوون، ته‌قێندراونه‌ته‌‌وه. 3 هێلیکۆپته‌ری کۆبراس هه‌ر له‌م ماوه‌یه‌دا، گوله‌یان به‌رکه‌وتووه و خه ساریان دیوه.

هه‌په‌گه‌ هه‌روه‌ها، باس له گیان له ده‌ست دانی 96 گه‌ریلایی کوردیش له ماوه‌ی 6 مانگی سه‌ره‌تای ساڵی 2007 دا ده‌کات و به کوژرانی 412 گه‌ریلا له مانگی حه‌زیران دا، باس له قورسترین خه‌ساری گیانی هه‌په‌گه‌ له 6 مانگی ڕابردوو دا ده‌کرێ.

ڕاپۆرتێکی نه‌ته‌وه‌یه‌کگرتووه‌کان باس له پێشێلکاری مافی کوردان له تورکیا ده‌کات

مانشێت نیوز، ژێنێڤ: نه‌ته‌وه‌یه‌کگرتووه‌کان له ڕاپۆرتێکی 17 لاپه‌ری دا باس له پێشێلکاری مافی کوردان و قه‌ده‌غه بوونی زمان و چالاکای پارته سیاسیه‌کانی کورد له تورکیا ده‌گرێ و پارتی بزووتنه‌وه‌ی نه‌ته‌وه‌په‌رستیش به ئه‌نجامی کرده‌وه‌ی تیرۆریستی تۆمه‌تبار ده‌کات.

کۆمیساریای به‌رزی په‌نابه‌رانی نه‌ته‌وه‌یه‌کگرتووه‌کان (UNHCR) له ڕاپۆرتێکی 17 لاپه‌ری دا سه‌باره‌ت به تورکیا، باس له نایاسایی بوونی پارتی کرێکارانی کوردستان (پ.ک.ک) و زیندانی بوونی کرتێری گشتی ئه‌م پارته «عه‌بدوڵا ئۆجه‌لان» ده‌کات و هه‌روه‌ها ناوی پارته‌کانی دێڤ سۆڵ (DEV-SOL) و تیککۆ (TIKKO) له ڕێکخراوه‌کانی چه‌پ ده‌کات که چالاکی سیاسیان له تورکیا لێ قه‌ده‌غه‌ کراوه.

ڕاپۆرته‌که باس له‌مه‌ ده‌کات که پ.ک.ک ده‌یه‌وێ له تورکیا چالاکی سیاسی ئه‌نجام بدات، به‌لام تورکیا هه‌ر چه‌شنه چالاکیه‌کی لێ قه‌ده‌غه کردووه و هه‌ڕوه‌ها باس له‌مه‌ش ده‌کات که تا ساڵه‌کانی 1991 زمانی کوردی به توندی قه‌ده‌غه کرابوو و له‌م ساڵانه‌ی دواییدا، خه‌ریکه ئیزن به گوتوبێژ به زمانی کوردی ده‌درێ که چی تا ئێستاش پڕۆگرامی ته‌له‌ڤزیۆنی و ڕادیۆی به زمانی کوردی قه‌ده‌غه‌یه.

له ڕاپۆرته‌که‌ دا هه‌روه‌ها باس له پارته‌کانی تورکیاش ده‌کات و له به‌شێک دا ئاماژه به پارتی بزووتنه‌وه‌ی نه‌ته‌وه‌په‌رست (MHP) ده‌کات که له‌م ساڵانه‌ی دواییدا، زیاتر له 5000 چالاکی سیاسی، به‌رپرسانی سه‌ندیکا و ڕۆشنبیری تیرۆر کردووه و ئێستاش وه‌کو پارتێکی سیاسی درێژه به چالاکیه‌کانی له تورکیا ده‌دات.

ئه‌رته‌شی پاکستان کۆتایی به شۆڕشی ئیسلامگه‌راکان له مزگه‌وتی لال هێنا

مانشێت نیوز، پاکستان: «ژه‌نه‌رال وه‌حید ئه‌ڕشه‌د» ئه‌مرۆ چوارشه‌ممه به ئاژانسه‌کانی ده‌نگوباسی ڕاگه‌یاند که ئه‌مڕۆ به کوژرانی 80 که‌س کۆتایی به‌م ئاڵۆزی و بارمته‌گیریه هات که ئیسلامگه‌راکانی لایه‌نگری تاڵیبان، له مزگه‌وتی لال له ئیسلام ئاباد پێکیان هێنابوو.

ژه‌نه‌رال وه‌حید ئه‌ڕشه‌د به ئاژانسی ئاششێیته‌د پڕێس و هه‌واڵنێری فه‌ره‌نسای گووتووه که ئه‌مڕۆ به کوژرانی سه‌رجه‌م 80 که‌س له میلیتانه جه‌کداره‌کان و هێزه‌کانی پۆلیسی پاکستان کۆتایی به یه‌ک حه‌وته شه‌ڕ و ئالۆزی و بارمته‌گیری ده‌یان ژن و مندال له مزگه‌وتی لال هات که ئیسلامگه‌رکانی لایه‌نگری تاڵیبان تێیدا خۆیان حاشار دابوو.

دوێنێ سه‌رۆکی ئیسلامگه‌راکان کاتێک که ده‌یه‌ویست خۆی ڕاده‌ست به هێزه‌کانی ئه‌رته‌شی پاکستان بکات، کوژرا و ئه‌مڕۆش کۆکردنه‌وه‌ی ته‌رمه‌کان و پاکسازی مزگه‌وته‌که له هه‌رچه‌شنه ته‌قینه‌وه‌یه‌ک ئه‌نجام درا و هه‌ر دوێنێش سه‌دان که‌س له شاری پیشاوه‌ری ئه‌م وڵاته به سه‌ردانی دروشمی «مردن بۆ موشه‌ڕه‌ف» خوازیاری به‌ره‌نگاری حکومه‌ت بوونه‌وه و ڕێکخراوی تالیبانیش فه‌توای جه‌هاد و هێرشی خۆکوژی دژ به هێزه‌کانی ئه‌منی پاکستان داوه.

پ.ک.ک به چه‌کی ئه‌مریکا دژ به تورکیا شه‌ڕ ده‌کات!

مانشێت نیوز، واشنتۆن: «نه‌بی شه‌نسۆی»، بالوێزی تورکیا له ئه‌مریکا ئه‌مرۆ ڕایگه‌یاند که میلیتانه‌‌کانی پ.ک.ک له شه‌ڕ له به‌رانبه‌ڕ‌ تورکیا دا له چه‌کی سازکراوی ئه‌مریکا که‌ڵک وه‌رده‌گرن و ئه‌مه‌ش تورکیایی نیگه‌ران کردووه.

باڵوێزی تورکیا له ئه‌مریکا وێڕای ڕاگه‌یاندنی ئه‌مه که چه‌کی ئه‌مریکی به ده‌ستی گه‌ریلاکانی پ.ک.ک‌وه دیتراوه و ته‌نانه‌ت ڕێژه‌یه‌کیش که‌وتۆته ده‌ستی ئه‌مریکا به‌ڵام به شێوه‌ی ڕاسته‌خۆ ئه‌مریکای به هاوکاری پ.ک.ک توانبار نه‌کرد، ئه‌گه‌رچی به ئاشکرا باس له‌مه‌ ده‌کات که چه‌که‌کان له ڕێگه‌ی بارزانی و تاڵه‌بانیه‌وه مومکینه که‌وتبێته ده‌ستی پ.ک.ک.

بالوێزی تورکیا هه‌روه‌ها ڕوونی کرده‌وه که به‌شێکی زۆر له‌م ته‌قه‌مه‌نی و جۆره دینامیتانه‌ی که پ.ک.ک له ته‌قینه‌وه‌کانی ناوخۆی تورکیا که‌لکی لێوه‌رده‌گرێ سازکراوی ئه‌مریکایه و ئه‌مه‌ش جگه له نیگه‌رانی تورکیا، بۆته هۆی ئه‌وه که ئه‌نقه‌ره داوا له واسنتۆن بکات، گووشاری پێویست بۆ حکومه‌تی هه‌رێم و به تایبه‌ت گرووپی بارزانی بێنێت که یارمه‌تی پ.ک.ک نه‌کات.

تورکیا به‌رده‌وام گله‌ی له ئه‌مریکا ده‌کات که ڕێگه‌ له هاوکاری نێوان پ.ک.ک و حکومه‌تی هه‌رێم نگرێ و ڕێگه‌ نه‌دات که چه‌کی سازکراوی ئه‌مریکا بکه‌وێته ده‌ستی پ.ک.ک، ئه‌وه له کاتێک دایه که حکومه‌تی هه‌رێمی کوردستان به‌رده‌وام ئه‌مه ره‌تده‌کاته‌وه که پشتیوانی ماڵی، لۆژێستیک و یاخود سیاسی له پ.ک.ک کردبێ. هه‌ر ئێستاش به وته‌ی هۆشیار زێباری، 140 هه‌زار سه‌ربازی تورکیا و ده‌یان تانک و زرێپۆش و فڕۆکه و هێلیکۆپته‌ر له سه‌ر سنووره‌کانی کوردستان ئاماده‌ی هێرشی بۆ کوردستانن، که‌چی تورکیا ئه‌م ڕێژه‌یه ته‌نیا بۆ 40 هه‌زار ده‌گه‌ڕێنێته‌وه به‌لام ڕۆژانه به‌رده‌وام هه‌ڕه‌شه‌ی به‌زاندنی سنوور ده‌کات.

له ئه‌ورووپا بۆ ئازادی که‌بوودوه‌ند، خۆپێشاندان سازکرا

مانشێت نیوز، ئۆسلۆ: به مه‌به‌ستی پڕۆتیستۆکردنی ده‌زگیر و زیندانی کردنی محه‌ممه‌د سه‌دیق که‌بوودوه‌ند، سه‌رۆکی ڕ.م.م.ک، ده‌یان هاوڵاتی کوردی دانیشتووی سکاندیناڤیا، له ولاتی نۆڕوێژ خۆپێشاندانێکیان له‌به‌ر ده‌رگای باڵوێزخانه‌ی ئێران ساز کرد.

ئه‌م خۆپێشاندانه که دوێنێ سێشه‌ممه‌ و له ئۆسلۆی پێته‌ختی وڵاتی نۆڕوێژ ئه‌نجام بوو و خۆپێشانده‌ران وێنه‌ی کژه‌بوودوه‌ند و دروشمگه‌لێکیان له‌ده‌ست دابوو که تێیدا داوای ئازادکردنی هه‌رچی زووتر و بێ مه‌رجی که‌بوودوه‌ندیان کرد.

به گوێره‌ی هه‌واڵێکی ڕ.م.م.ک، خۆپێشاندانه‌که‌ له لایه‌ن کۆمیته‌ی پارێزڤانی له مافی مرۆڤی کورد له ئه‌وروپا سازدرابوو.

حکومه‌تی هه‌رێمی کوردستان گۆڕانکاری له یاسای نه‌وت قه‌بوول ناکات

مانشێت نیوز، هه‌ولێر: حکومه‌تی هه‌رێمی کوردستان یاسای نه‌وت به‌م گۆڕانکاریانه‌ی که تێیدا ئه‌نجام دراوه قه‌بوول ناکات و به هیچ شێوه‌ش ڕازی نابێت که ده‌سه‌ڵاتی هه‌رێمی کوردستان له ناو یاساکه دا که‌مبکاته‌وه.

«دوکتۆر ئاشتی هه‌ورامی»، وه‌زیری سامانه سروشتیه‌کانی هکومه‌تی هه‌رێمی کوردستان  ڕایگه‌یاند که له‌م دوایانه دا هه‌ندێک گۆڕانکاری له ناوه‌ڕۆکی یاسای هیدرۆکه‌ربۆن کراوه که هه‌وڵ ده‌دات ڕۆڵی کوردستان له کۆنترۆڵی سه‌رچاوه‌ نه‌وتیه‌کان که‌مبکاته‌وه و ئێمه‌ش به‌م شێوه قه‌بوولی ناکه‌ین و داواکاری گه‌ڕاندنه‌وه‌ی یاساکاه بۆ ناوه‌رۆکی پێش گۆڕانی ده‌که‌ین.

هه‌ورامی باسی له‌م گۆڕانکاریانه‌ نه‌کرد که کورد قه‌بوولی ناکات، به‌ڵام عه‌لی ئه‌لده‌باغ، وته‌بێژی حکومه‌تی عێراق له سه‌ردانی چه‌ند ڕۆژی ڕابردووی خۆی بۆ کوردستان دا وتی که یاساکه هیچ گۆڕانکاریه‌کی بنچینه‌ی تێدا نه‌کراوه‌، به‌لکو ته‌نیا له شکڵ و قه‌اره‌ی نووسینه‌که‌ی دا گۆڕانێک پێکهاتووه.

له لایه‌کی تریشه‌وه،»عه‌دنان موفتى» سه‌رۆكى پارله‌مانى كوردستان، جه‌خت له سه‌ر ئه‌مه ده‌کاته‌وه‌ که سه‌ركردایه‌تى سیاسى كوردستان و پارله‌مان «یاساى نه‌وت و گاز» ره‌ت ده‌كه‌نه‌وه‌ ئه‌گه‌ر مافى گفتوگۆ كردن سه‌باره‌ت به‌ گرێبه‌ست له‌گه‌ڵ كۆمپانیاكان نه‌دات به‌ هه‌رێم. جگه له‌مه‌ش ئه‌و یاسایه‌ى ئه‌نجومه‌نى وه‌زیرانى عراق په‌سه‌ندى كرد هه‌مان ئه‌و یاسایه‌ نیه‌ كه‌ له‌ کوردستان، دا رێكه‌وتنى له‌سه‌ر كراوه‌.

عه‌دنان موفتى له‌مباره‌وه هه‌روه‌ها ده‌ڵێ که «هه‌رێمى كوردستان مافى خۆیه‌تى كه‌ گفتوگۆ له‌گه‌ڵ كۆمپانیاكان بكات بۆ گرێبه‌سته‌كان به‌ڵام له‌ كۆتایى دا با بڕیاری دوایى بگه‌رێته‌وه‌ بۆ ئه‌نجومه‌نى فیدراڵى نه‌وت و گاز كه‌ نوێنه‌رى هه‌رێمیشى تیا ده‌بێت .

له سه‌قز، بۆ د. قاسملوو، ئاماده‌کاری خۆپێشاندان و مانگرتنی بازاڕیان ده‌کرێ

مانشێت نیوز، سه‌قز: له شاری سه‌قزه‌وه هه‌و‌المان پێگه‌یشت که باری ئه‌منی شار نائاساییه و شوێنه گرینگه‌کانی شار له ژێر چاوه‌دێری هێزه‌کانی ئه‌منی و ئیتلاعاتی دان و هاوڵاتیان به مه‌به‌ستی یادی ساڵه‌هاتی تیرۆری قاسملوو، خۆ بۆ داخستنی بازاڕه‌کان و خۆپێشاندانی جه‌ماوه‌ری ئاماده‌ ده‌که‌ن.

به گوێره‌ی ئه‌م هه‌والانه‌ی له شاری سه‌قزه‌وه به ده‌ستمان گه‌یشتوون، له‌م ڕۆژانه‌ی دوایدا، ڕه‌وشی ئه‌منی شار نائاساییه و له حه‌وتووی ڕابردوو دا ده‌یان ڕاگه‌یاندراو و تراکت و شه‌ونامه، له نێو ئه‌سناف، بازاڕیان و شۆفیران دا بلاوکراوه‌ته‌وه و ته‌نانه‌ت به ته‌‌له‌فۆن داوا له هاوڵاتیانی ئه‌م شاره کراوه که ڕۆژی 22ی پووشپه‌ر، هاوکات له‌گه ڵ تیرۆری دوکتۆر عه‌بدوڵڕه‌حمان قاسملوو، ڕێبه‌ری شه‌هیدی حدکا، دووکانه‌کان دابخه‌ن، مان بگرن و خۆپێشاندانی پڕۆتیستۆیی ساز بکه‌ن.

هه‌ر بۆیه‌ش، به‌رپرسانی ئه‌منی ڕه‌ژیم داوای ناردنی گاردی تایبه‌تی دژه‌شۆڕش و هێزی پشتیوانیان له شاره‌کانی ده‌ورووبه‌ر وه‌‌کو تیکاب و میاندواو کردووه و له ناو شاریش جگه له ئافراندی بارێکی نائاسایی هه‌وڵی چاوترسێن کردنی هاوڵاتیان ده‌درێ و تا ئێستا ده‌یان که‌س له بازاریان، کاسبکاران و چالاکانی سیاسی و مه‌ده‌نی بانگهێشتی ئیداره‌‌‌کانی ئیتلاعات و ناوه‌نده‌کانی ئه‌منی کراون.

شایانی باسه که شاری سه‌قز، به‌ڕده‌وام یه‌کێک له شاره‌ پێشڕه‌وه‌کانی کوردستانی ڕۆژهه‌ڵات بووه له سه‌رهه‌لدان و خۆپێشاندانی پڕۆتیستۆیی جه‌ماوه‌ری دژ به سیاسه‌ته‌کانی ڕه‌ژیم و که‌شو هه‌‌وای نائازاد و داخراوی کۆمه‌لگا.

سارکۆزی نامه‌ی سپاسی بۆ دامه‌زراوه‌ کوردیه‌کانی فه‌ره‌نسا نارد

مانشێت نیوز، پاریس: سه‌رکۆماری تازه‌هه‌لبژێردراوی فه‌ره‌نسا، نامه‌ی سپاسی بۆ سه‌رۆکی ڕێکخراو و فێدراسیۆنه‌ کوردیه‌کانی ئه‌م وڵاته له پاریس نارد که پیرۆزبایی پۆسته‌که‌یان لێکردبوو و ده‌نگیان پێدابوو.

فێدراسیۆنی کۆمه‌ڵه ودامه‌زراوه‌‌ کوردیه‌کانی فه‌ره‌نسا، به بۆنه‌ی پیرۆزبایی له «نیکۆڵاس سارکۆزی» نامه‌یه‌کیان بۆ کۆشکی کۆماری ئه‌م ولاته ناردبوو و پاشان سارکۆزی وه‌لامی نامه‌که‌ی داوه‌ته‌وه و وتوویه‌تی که نامه‌ی کوردان شوێنی له سه‌ر داناوه و ئه‌و پێداگری له سه‌ر چاره‌سه‌ری کێشه‌ی کورد به ڕێگای دیالۆگ و ئاشتیانه ده‌کات و ڕێزی پشتیوانیان له هه‌ڵبژاردنی خۆی ده‌گرێ.

به گوێره‌ی ئاژانسی فورات، سه‌رۆکی فێدراسیۆنه کوردیه‌کانی فه‌ره‌نسا «نه‌جمه‌دین ده‌میرئاڵپ» له نامه‌که‌ دا داوای له نیکۆلاس سارکۆزی سه‌رۆک کۆماری ئه‌م وڵاته کردبوو که هه‌ولی چاره‌سه‌ری کێشه‌ی کورد و په‌ره‌پێدانی دیالۆگی نێوان گه‌لی کورد و فه‌ره‌نسا بدات.

سارکۆزی له کاتی پرۆپاگه‌نده‌ی هه‌ڵبژاردنه‌کان دا وتبووی که ئه‌و و پارته‌که‌ی نایانه‌وێ که کێشه‌ی کورد و کوردستان ببێته کێشه‌ی ئه‌ورووپا و یه‌کێک له هۆکاره‌ سه‌ره کیه‌کانی ڕه‌تکردنه‌وه‌ی ئه‌ندامه‌تی تورکیا له یه‌کێتی ئه‌ورووپاشی هه‌ر به کێشه‌ی کورد ناوبردبوو.

هێزی پێشمه‌رگه‌ی کوردستان، بۆریه نه‌وته‌کانی که‌رکووک و تاوه‌ره‌کانی کاره‌با ده‌پارێزێ

مانشێت نیوز، هه‌ولێر: جه‌ببار یاوه‌ر، وته‌بێژی هێزی پێشمه‌رگه‌ی کوردستان ئاشکرای کرد که حکومه‌تی عێراق داوای له هێزه‌کانی پاسه‌وانی هه‌رێمی کوردستان کردووه که تاوه‌ره‌کانی گوازتنه‌وه‌ی کاره‌با و بۆڕیه‌ن نه‌وتیه کانی که‌رکووک بپارێزن

به گوێره‌یی ئه‌م هه‌‌واله‌، «جه‌ببار یاوه‌ر»، وته‌بێژی هێزی پێسمه‌رگه‌ی کوردستان ڕایگه‌یاند که حكومه‌تی‌ عێراقی‌ فیدراڵ به‌ڕه‌سمی‌ داوا له‌ هێزه‌كانی‌ پاسه‌وانی‌ هه‌رێمی‌ كوردستان کردووه که یارمه‌تی‌ حكومه‌تی‌ فیدراڵ بده‌ن بۆ پاراستنی‌ بۆرییه‌ نه‌وتیه‌كان و تاوه‌ره‌كانی‌ گواستنه‌وه‌ی‌ كاره‌با له‌ كه‌ركوك.

وته‌بێژی هێزی پێشمه‌رگه ده‌ڵێت که داوا کراوه تا له ناوچه‌ی تازه‌ی بێجی تا ده‌گاته کوردستان تاوه‌ره‌کانی گوازتنه‌وه‌ی وزه‌ی کاره‌با که بۆ کوردستان دێت و هێڵی بۆریه‌کانی نه‌وت، له لایه‌ن هێزی پێشمه‌رگه‌وه بپارێزێ و سه‌باره‌ت به‌م داخوازیه‌ش گفتگۆکان له سه‌ر چۆنیه‌تی به‌ڕێوه‌بردنی ئه‌رکه‌که له نێوان هه‌ولێر و به‌غدا، به‌رده‌وامه.

دوواین وتووێژی دوکتۆر قاسملوو له‌گه‌ڵ دیپلۆماتی تیرۆریسته‌کانی کۆماری ئیسلامی

وه‌رگێران و ئاماده‌ كردنی‌: قادر وریا

زۆر كه‌س هه‌ن كه‌ ئاره‌زوو ده‌كه‌ن بزانن ئه‌و قسانه‌ی‌ له‌ چاوپێكه‌وتنی‌ دوكتور قاسملوو‌و دیپڵۆمات ـ تیرۆریسته‌كانی‌ كۆماری‌ ئیسلامی‌ له‌ دانیشتنی‌ وییه‌ن دا كران، چ بوون.

دوكتور قاسملوو بۆ باس له‌سه‌ر داخوازه‌كانی‌ گه‌لی‌ كورد له‌ گه‌ڵ‌ نوێنه‌رانی‌ كۆماری‌ ئیسلامی‌‌و دیتنه‌وه‌ی‌ رێگاچاره‌یه‌كی‌ ئاشتیخوازانه‌ بۆ كێشه‌ی‌ كورد له‌ كوردستانی‌ ئێران، چووبووه‌  وییه‌ن. ئه‌و قسانه‌ش كه‌ له‌و چاوپێكه‌وتنه‌دا كردبوونی‌،  هه‌ر له‌و پێوه‌ندی‌یه‌دا بوون. به‌ڵام ئه‌وانه‌ی‌ به‌ ناوی‌ نوێنه‌رانی‌ كۆماری‌ ئیسلامی‌یه‌وه‌ بۆ وتووێژ له‌گه‌ڵ‌ دوكتور قاسملوو‌و هاوڕێیانی‌ هاتبوون، نیازێكی‌ دیكه‌یان هه‌بوو. ئه‌وان بۆ كوشتنی‌ «پێغه‌مبه‌ری‌ ئاشتی‌» هاتبوون.

رۆژنامه‌ی‌ فه‌رانسه‌یی‌ لۆمۆند رۆژی‌ 1ی‌ ژانویه‌ی‌ 1998 وتارێكی‌ به‌ قه‌ڵه‌می‌ كریس كۆچێرا له‌ باره‌ی‌ نێوه‌رۆكی‌ نه‌واری‌ قسه‌كانی‌ دوكتور قاسملوو‌و ناردراوانی‌ رێژیمی‌ ئێران له‌ چاوپێكه‌وتنی‌ وییه‌ن دا، بڵاو كرده‌وه‌. گۆڤاری‌ «ێ‌رش»یش له‌ ژماره‌ 65ی‌ خۆی‌دا وه‌گێڕدراوی‌ فارسیی‌ ئه‌م وتاره‌ی‌  بڵاوكردۆته‌وه‌. به‌م هۆیه‌وه‌ كه‌ زۆر له‌ خوێنه‌رانی‌ «تێكۆشه‌ر» ئه‌م وتاره‌یان نه‌دیوه‌، به‌ پێویستمان زانی‌ وه‌ری‌ بگێڕینه‌وه‌ سه‌ر زمانی‌ كوردی‌‌و به‌ بۆنه‌ی‌ نۆیه‌مین ساڵڕۆژی‌ شه‌هید بوونی‌ رێبه‌ری‌ مه‌زنمان، له‌» تێكۆشه‌ر»دا بڵاوی‌ بكه‌ینه‌وه‌.

13ی‌ ژوئیه‌ی‌ 1989، عه‌بدوڵره‌حمان قاسملوو سكرتێری‌ ]گشتی‌[ی‌ حیزبی‌ دێمۆكراتی‌ كوردستانی‌ ئێران، به‌ هۆی‌ دوو گولله‌ كه‌ وه‌سه‌ری‌ كه‌وتبوو، له‌گه‌ڵ‌ دوو كه‌سی‌ دیكه‌ له‌ هاوڕێیانی‌، له‌ ئاپارتومانێكی‌ شاری‌ وییه‌ن دا، كوژرا. ئه‌و كاته‌، ده‌ ساڵ‌ بوو كه‌ شه‌ڕ له‌ نێوان ئه‌رته‌شی‌ تاران‌و پێشمه‌رگه‌ كورده‌كان دا درێژه‌ی‌ هه‌بوو. به‌ دوای‌ یه‌كه‌م چاوپێكه‌وتن له‌ دیسامبری‌ 1988‌و ژانویه‌ی‌ 1989دا، قاسملوو سه‌ر له‌نوێ‌ ئه‌و چاوپێكه‌وتنانه‌ی‌ له‌گه‌ڵ‌ نوێنه‌رانی‌ ]رێژیمی‌[ ئێران ده‌ست پێ‌كرده‌وه‌. یه‌كێك له‌م نوێنه‌رانه‌ محه‌ممه‌د جه‌عفه‌ر سه‌حراروودی‌، جێگری‌ سه‌رۆكی‌ ئیتلاعاتی‌ (نێوخۆیی‌) پاسدارانی‌ شۆرش له‌ كوردستان بوو، كه‌ له‌ ته‌قه‌ كردنه‌كه‌دا بۆخۆشی‌ بریندار بوو.

سه‌حراروودی‌ كه‌ له‌ یه‌كێك له‌ نه‌خۆشخانه‌كان خستبوویان، له‌لایه‌ن پۆلیسی‌ ئوتریشه‌وه‌ ئیجازه‌ی‌ چوونه‌ ده‌ر له‌ نه‌خۆشخانه‌ی پێ‌درا‌و توانی‌ په‌نا بۆ سه‌فاره‌تی‌ ئێران ببا. ناوبراو له‌ 22ی‌ ژووئیه‌دا له‌ ئوتریش وه‌ده‌ركه‌وت. پارێزه‌ر( ئیسكۆرت)ێكی‌ دیكه‌ی‌ ئێرانی‌ به‌ ناوی‌ «بوزورگیان» بۆ ماوه‌یه‌ك له‌ ئیداره‌ی‌ پۆلیس راگیرا، پاشان بڕیاری‌ گرتنی‌ ئه‌و كه‌سه‌ كه‌ پێشتر درابوو، هه‌ڵ‌وه‌شێندرا‌و ئه‌ویش توانی‌ بگه‌ڕێته‌وه‌ ئێران. سێهه‌م كه‌س حاجی‌ مسته‌فه‌وی‌  لاجه‌وه‌ردی‌ سه‌رۆكی‌ به‌شی‌ ئیتلاعات (ی‌ نێوخۆیی‌)له‌ كوردستان، به‌ ئازادی‌یه‌كی‌ ته‌واوه‌وه‌ توانی‌ له‌ ئوتریش بچێته‌ ده‌ر.

وتووێژه‌كانی‌ ناردراوانی‌ تاران‌و رێبه‌رانی‌ كورد به‌هۆی‌ به‌شدارانی‌ وتووێژه‌كه‌وه‌ له‌سه‌ر كاسێت تۆمار كراوه‌. ئه‌ونه‌وارانه‌ كه‌ له‌ ده‌ستی‌ پۆلیس دابوون، سه‌رئه‌نجام درانه‌وه‌ به‌ به‌رپرسانی‌ حیزبی‌ دێمۆكراتی‌ كوردستانی‌ ئێران.عه‌بدوڵلاحه‌سه‌ن زاده‌ سكرتێری‌ گشتیی‌ حیزبی‌ دێموكراتی‌ كوردستانی‌ ئێران ئیجازه‌ی‌ گوێگرتن له‌و  كاسێتانه‌ی‌ پێ‌داین. عه‌بدوڵره‌حمان قاسملوو قه‌ت به‌م وردبینی‌یه‌ ده‌روونناسی‌یانه‌وه‌ بۆچوونه‌كانی‌ خۆی‌ له‌باره‌ی‌ خودموختاری‌ بۆ كوردستانی‌ ئێران شی‌ نه‌كردبۆوه‌:

پرسیار‌و وه‌ڵامه‌كانی‌ لایه‌نه‌ ئێرانی‌یه‌كان ]نوێنه‌رانی‌ رێژیمی‌ ئێران[ كه‌ پێیان وانه‌بوو رۆژێك له‌ رۆژان قسه‌كانیان ئاشكرا ده‌بن، زۆر به‌ باشی‌ ناته‌با بوونی‌ بۆچوونه‌كانیان‌و روحیاتی‌ به‌رپرسانی‌ كۆماری‌ ئیسلامیی‌ ئێران له‌ نێوان بڕوا هه‌بوون به‌ روانگه‌‌و دیارده‌ سیاسی‌یه‌ مۆدێرنه‌كان‌و بیروبۆچوونه‌كانی‌ سه‌رده‌می‌ خه‌لافه‌تی‌ عه‌لی‌دا، نیشان ده‌ده‌ن.

ئایا بكوژانی‌ قاسملوو پاش بیستنی‌ بۆچوونه‌كانی‌، بڕیاریان دا بیكوژن؟ یان ته‌نانه‌ت به‌رله‌ ده‌ست پێكردنی‌ قسه‌كانی‌، بڕیاری‌ كوشتنیان دابوو؟ گوێڕاگرتن بۆ نه‌واره‌كان،ئه‌م سیناریۆیه‌ی‌ خواره‌وه‌مان دێنێته‌ به‌رچاو:

ده‌سه‌ڵاتدارانی‌ ئێران كه‌ ده‌یانزانی‌ بزووتنه‌وه‌ی‌ قاسملوو له‌ ئاكامی‌ زه‌بره‌ نیزامی‌یه‌كانی‌ ]رێژیمی‌[ ئێران‌و له‌ت بوونێك كه‌ ساڵی‌ 1988 ]ئه‌م بزووتنه‌وه‌یه‌[ به‌خۆیه‌وه‌ی‌ دیت، زۆر لاواز بووه‌‌و، هه‌روه‌ها ده‌یانزانی‌ قاسملوو پێی‌ خۆشه‌ كێشه‌كه‌ له‌ رێگای‌ وتووێژه‌وه‌ چاره‌سه‌ر ببێ‌، هه‌ر بۆیه‌ هومێدی‌ ئه‌وه‌یان هه‌بوو كه‌ له‌وانه‌یه‌ به‌ نیوه‌ی‌ داخوازه‌كانی‌، واته‌ تێكۆشانی‌ قانوونیی‌ حیزبه‌كه‌ی‌ رازی‌ بێ‌، به‌ڵام پاش ئه‌وه‌ی‌ قاسملوو له‌سه‌ر ئه‌وه‌ پێ‌داده‌گرێ‌ كه‌ رێبه‌رانی‌ تازه‌ی‌ ئێران (خومه‌ینی‌ ماوه‌یه‌ك پێشتر له‌ 4ی‌ ژوئه‌نی‌ 1989دا مردبوو) ده‌بێ‌ رابگه‌یه‌نن كه‌ داخوازی‌ خودموختارییان قه‌بووڵه‌، ناردراوانی‌ تاران به‌ دوای‌ یه‌كه‌م چاوپێكه‌وتن دا، له‌گه‌ڵ‌ به‌رپرسانی‌ خۆیان پێوه‌ندی‌ ده‌گرن كه‌ دیاره‌ ده‌ستووریان پێ‌ده‌درێ‌: «بیكوژن».

سه‌حراروودی‌ راده‌گه‌یه‌نێ‌ كه‌ «ئێمه‌ پێكه‌وه‌ رێك كه‌وتووین كه‌ ئه‌م چاوپێكه‌وتنانه‌مان به‌ ته‌واوی‌ نهێنی‌ بمێننه‌وه‌». چونكه‌ «دوژمنانێك هه‌ن كه‌ نایانه‌وێ‌ ئه‌و گیروگرفتانه‌ چاره‌سه‌ر بكرێن». ئه‌و، پێ‌ له‌سه‌ر ئه‌وه‌ داده‌گرێ‌» «ته‌نانه‌ت له‌نێو حكوومه‌تی‌ ئێرانیش دا، كه‌سانێك هه‌ن كه‌ دژی‌ هه‌ر جۆره‌ چاوپێكه‌وتن‌و پێوه‌ندی‌یه‌كن. له‌ ئاستی‌ هه‌ڵسووڕێنه‌رانی‌ وڵات دا ته‌نانه‌ت قسه‌كردنی‌ راشكاوانه‌ش له‌باره‌ی‌ ئه‌م مه‌سه‌له‌یه‌وه‌ مومكین نیه‌».

عه‌بده‌ڵره‌حمان قاسملوو دێته‌سه‌ر كاكڵه‌ی‌ مه‌سه‌له‌كه‌: «له‌ دوو چاوپێكه‌وتنی‌ پێشوومان دا، ئێمه‌ له‌باره‌ی‌ دوو خاڵی‌ ئه‌سڵی‌یه‌وه‌ قسه‌مان كرد: قبووڵ‌ كردنی‌ ئه‌سڵی‌ خودموختاری‌‌و ئه‌سڵی‌ تێكۆشانی‌ ئازادانه‌ی‌ حیزبی‌ ئێمه‌ له‌نێوخۆی‌ وڵات دا. ئێوه‌ وڵامتان دایه‌وه‌ كه‌ هه‌ڵسووڕێنه‌رانی‌ رێژیم له‌گه‌ڵ‌ قه‌بووڵ كردنی‌ ئه‌سڵی‌ خودموختاری‌دا نین. له‌باره‌ی‌ خاڵی‌ دووهه‌مه‌وه‌، ئێمه‌ له‌ ده‌فته‌ری‌ سیاسی‌دا باسێكی‌ زۆر دوورو درێژمان هه‌بوو كه‌ ئایا پێشمه‌رگه‌كان چه‌كه‌كانیان ته‌حویل بده‌نه‌وه‌ یان نا؟ ده‌فته‌ری‌ سیاسی‌ وا بیر ده‌كاته‌وه‌ كه‌ مومكین نیه‌ چه‌ك ته‌حویل بدرێته‌وه‌. ئێوه‌ ده‌بێ‌ له‌ومه‌سه‌له‌یه‌ بگه‌ن كه‌ پاش ده‌ ساڵ‌ شه‌ڕو ئه‌و هه‌موو قوربانیدانه‌، خودموختاری‌ بووه‌ به‌ سه‌مبولی‌ داخوازه‌كانی‌ ئێمه‌. ئێوه‌ ده‌تانه‌وێ‌ ئێمه‌ وشه‌یه‌كی‌ دیكه‌ به‌كار بێنین؟ ئه‌گه‌ر نیوه‌رۆكی‌ خودموختاری‌ قه‌بووڵ‌ ده‌كه‌ن، چلۆنه‌ كه‌ له‌ وشه‌ی‌ خودموختاری‌ ده‌ترسن؟» قاسملوو هه‌ر له‌و كاته‌دا كه‌ خۆی‌ وك پیاوی‌ خودموختاری‌ ناو ده‌با، ده‌ڵێ‌: «نه‌سڵی‌ من، نه‌سڵی‌ دێمۆكراسی‌و خودموختاری‌یه‌». پاشان وێڕای‌ داوای‌ درێژه‌ی‌ وتووێژ، وریایان ده‌كاته‌وه‌و ده‌ڵێ‌: «دڵنیا بن ئه‌گه‌ر گیروگرفتی‌ كورد چاره‌سه‌ر نه‌بێ‌، ئه‌م مه‌سه‌له‌یه‌ ده‌بێته‌ هۆی‌ دوور بوونه‌وه‌ له‌ مه‌ركه‌زو جیاییخوازی‌»…

سه‌حراروودی‌: «ئه‌وه‌ یه‌كه‌م جاره‌ كه‌ له‌ نێومان دا له‌سه‌ر ئه‌و شته‌ كه‌ ئیسلام بۆ میلله‌ته‌كانی‌ ده‌كا، باس ده‌كه‌ین. ئێمه‌ بۆ چاره‌سه‌ركردنی‌ گیروگرفته‌كانمان گوێ‌ به‌ قسه‌ی‌ كه‌س ناده‌ین، نه‌ رۆژهه‌ڵات‌و نه‌ رۆژئاوا، ئێمه‌ ئاماده‌ین خۆمان بكه‌ین به‌ قوربانیی‌ بیروباوه‌ڕمان».

قاسملوو… » من ده‌مه‌وێ‌ شتێكتان عه‌رز بكه‌م، من له‌و هه‌موو كۆسپانه‌ی‌ له‌ پێوه‌ندی‌ له‌گه‌ڵ‌ راگه‌یاندنی‌ خودموختاری‌دا، ناوتان بردن، قانیع نه‌بووم… له‌ هه‌لو مه‌رجی‌ ئێستادا ئه‌وه‌ ئاغایان خامه‌نه‌یی‌‌و ره‌فسه‌نجانین كه‌ نوێژی‌ هه‌ینیی‌ تاران به‌ڕێوه‌ ده‌به‌ن. ئه‌وان ده‌توانن له‌ باره‌ی‌ خودموختاریی‌ كوردستانه‌وه‌ بیروڕای‌ خۆیان رابگه‌یه‌نن». قاسملوو پاشان روانگه‌‌و بووچوونی‌ خۆی‌ له‌ باره‌ی‌ خودموختاری‌یه‌وه‌ به‌ درێژی‌ شی‌ ده‌كاته‌وه‌: «بۆ ئێمه‌ چوار خاڵی‌ بنه‌ڕه‌تی‌ له‌گۆڕێ‌دان: خودموختاری‌، به‌ مانای‌ كۆنه‌بوونه‌وه‌ی‌ ده‌سه‌ڵات له‌ ناوه‌ند، دووهه‌م خاڵی‌ بنه‌ڕه‌تی‌ بۆ ئێمه‌ زمانی‌ كوردی‌یه‌. كوردی‌ ده‌بێ‌ ببێته‌ زمانی‌ ره‌سمیی‌ ناوچه‌ كوردنشینه‌كان. سێهه‌م خاڵ‌ دیاریكردنی‌ سنووره‌كانی‌ ناوچه‌ی‌ خودموختاره‌. بۆ ئه‌م مه‌به‌سته‌ ده‌بێ‌ فاكتۆره‌كانی‌ جوغرافیایی‌، ئابووری‌‌و به‌تایبه‌تی‌ ویستی‌ ئه‌و خه‌ڵكه‌ی‌ له‌ ناوچه‌ كوردنشینه‌كان دا ده‌ژین، سه‌رنجیان بدرێتێ‌. چواره‌م خاڵی‌ گرنگ بۆ میلله‌تی‌ كورد، ده‌بێ‌ ئه‌منییه‌تی‌ نێوخۆیی‌ ناوچه‌ كوردنشینه‌كان به‌ هۆی‌ كورده‌كانه‌وه‌ به‌ڕێوه‌ بچێ‌… ئێمه‌ شتێكی‌ له‌وانه‌ زیاترمان ناوێ‌. ئه‌وه‌نده‌ی‌ پێوه‌ندیی‌ به‌ وه‌دیهاتن‌و جێبه‌جێ‌ بوونی‌  ئه‌م داخوازانه‌وه‌ هه‌یه‌، ئێمه‌ واقیع بینین. بۆ وێنه‌ له‌سه‌ر دیاریكردنی‌ سنووری‌ ناوچه‌ی‌ خودموختار ناكۆكی‌‌و كێشه‌ی‌ چووكه‌ ده‌بن. به‌ڵام كورده‌كان ئاماده‌ن نین له‌سه‌ر ئه‌م شته‌ چكۆلانه‌ به‌شه‌ڕ بێن، به‌ مه‌رجێك كه‌ ئه‌سڵه‌كه‌ قبووڵ‌ بكرێ‌.»

قاسملوو به‌م جۆره‌ ئاكام له‌ باسه‌كان وه‌رده‌گرێ‌:

«ئه‌وه‌یان مومكین نیه‌ كه‌ وشه‌ی‌ خودموختاری‌ چاوپۆشی‌ لێ‌ بكرێ‌. ئه‌م وشه‌یه‌ بۆ نه‌ته‌وه‌ی‌ كورد واتایه‌كی‌ عاتیفی‌و مێژوویی‌ هه‌یه‌. ئه‌م وشه‌یه‌ سه‌مبولێكه‌. من وا هه‌ست ده‌كه‌م كه‌ ئێوه‌ نێوه‌رۆكه‌كه‌ قبووڵ‌ بكه‌ن به‌ڵام ده‌تانه‌وێ‌ ئێمه‌ واز له‌ وشه‌كه‌ بێنین. له‌ ئیسلام دا هه‌ركاتێك ده‌قێكی‌ پیرۆز ده‌خوێننه‌وه‌، ناكرێ‌ بێ‌ گوتنی‌ «بسم الله‌ الرحمن الرحیم» ده‌ست پێ‌ بكرێ‌. ئه‌وه‌ش راست وایه‌. ئێوه‌ نیوه‌رۆكی‌ خودموختاریتان قبووڵه‌ به‌ڵام به‌ بێ‌ «بسم الله‌ الرحمن الرحیم».

ئێرانی‌یه‌كان (ناردراوانی‌ رێژیم)  ده‌ڵێن بۆ درێژه‌ی‌ باسه‌كان كه‌ هومێدێكی‌ زۆریان خوڵقاندوه‌ ده‌بێ‌ له‌گه‌ڵ‌ تاران پێوه‌ندی‌ بگرین. بۆ سبه‌ینێ‌ رۆژی‌ 13ی‌ ژوئیه‌ سه‌حراروودی‌ ده‌ڵێ‌ له‌گه‌ڵ‌ براده‌ران پێوه‌ندیی‌ گرتوه‌: «ئێوه‌ دوێنێ‌ گوتتان كه‌ به‌رپرسانی‌ ئێرانی‌ ده‌توانن له‌ نوێژی‌ هه‌ینی‌ دا له‌ باره‌ی‌ خودموختاری‌یه‌وه‌ قسان بكه‌ن… هێندێك مه‌سه‌له‌ هه‌ن كه‌ به‌رپرسان‌و ئیمام جومعه‌كان ده‌توانن له‌باره‌یانه‌وه‌ قسه‌ بكه‌ن. به‌ڵام ده‌بێ‌ بزانن كه‌ له‌سه‌ر هێندێك مه‌سه‌له‌ بۆچوونی‌  جیاوازمان هه‌ن.»

سه‌حراروودی‌ باسێكی‌ دوور‌و درێژ ده‌ست پێ‌ده‌كا كه‌ هیچ پێوه‌ندی‌یه‌كی‌ به‌ مه‌سه‌له‌كه‌وه‌ نیه‌…»ئێستا دێینه‌وه‌ سه‌ر مه‌سه‌له‌ی‌ خودموختاری‌. له‌م باره‌یه‌وه‌ دوو فكر هه‌ن. یه‌كێك له‌م فكرانه‌ ده‌مانگێڕێته‌وه‌  بۆ سه‌رده‌می‌ حه‌زره‌تی‌ عه‌لی‌‌و، ئه‌ویش ئه‌مه‌یه‌ كه‌ حه‌زره‌تی‌ عه‌لی‌ له‌ ناوه‌ندی‌ خه‌لافه‌ت دانیشتبوو‌و حكوومه‌تی‌ ده‌كرد. به‌ڵام هێندێك ناوچه‌ هه‌بوون به‌ ناوی‌ «ولایت» (ئوستان) كه‌ حاكمه‌كان (والی‌یه‌كان) ده‌سه‌ڵاتی‌ ئه‌وێیان به‌ده‌سته‌وه‌ بوو‌و، له‌ چاو ناوچه‌ خودموختاره‌كان ده‌سه‌ڵاتێكی‌ به‌ربڵاوتریان هه‌بوو. له‌لایه‌كی‌ دیكه‌وه‌ كه‌سانی‌ ئه‌وتۆ هه‌ن كه‌ ئه‌م فكره‌ به‌ هی‌ سه‌رده‌می‌ عه‌لی‌ ده‌زانن‌و له‌سه‌ر ئه‌م باوه‌ڕن كه‌ هه‌لومه‌رجی‌ ئه‌مڕۆ جیاوازه‌، دوژمن چوار ده‌وری‌ ئێمه‌ی‌ گرتوه‌. واته‌ وڵاتانێك كه‌ ئه‌ندامی‌ په‌یمانی‌ ناتۆ (اوتان)ن،  رێژیمه‌ كۆنه‌په‌رسته‌كان، كه‌ ناهێڵن خودموختاری‌ هه‌ر له‌ چوارچێوه‌ی‌ خۆی‌ دا وه‌مێنێ‌. ئه‌وان هه‌وڵ‌ ده‌ده‌ن كه‌ چوارچێوه‌كه‌ی‌ به‌رین بكه‌نه‌وه‌ تا سه‌رئه‌نجام ده‌گا به‌ سه‌ربه‌خۆیی‌. كه‌ وا بوو خودموختاری‌ مه‌سه‌له‌یه‌ك نیه‌ كه‌ ئێمه‌ بتوانین به‌ یه‌ك دوو به‌یاننامه‌ له‌ نوێژی‌ هه‌ینی‌دا چاره‌سه‌ری‌ بكه‌ین. مه‌سه‌له‌ی‌ دووهه‌م: حیزبی‌ دێمۆكراتی‌ كوردستان ده‌یه‌وێ‌ هه‌م هه‌لومه‌رجی‌ پێشوو بپارێزێ‌‌و هه‌م له‌گه‌ڵ‌ كۆماری‌ ئیسلامی‌ وتووێژ بكا، به‌ڵام من دڵنیام كه‌ ئه‌وه‌ی‌ لـێ‌قبووڵ‌ ناكرێ‌».

سه‌حراروودی‌ درێژه‌دانی‌ قسه‌كانی‌ به‌ حاجی‌ مسته‌فه‌وی‌ ده‌سپێرێ‌. ناوبراو ده‌ڵێ‌: «بسم الله‌ الرحمن الرحیم»… حیزبه‌ كومونیسته‌كان له‌ باره‌ی‌ میلله‌ته‌كانه‌وه‌ په‌یڕه‌وی‌ له‌ تیئۆریی‌ ئیستالین ده‌كه‌ن. عه‌ره‌به‌كان ده‌ڵێن ئه‌وه‌ نه‌زه‌ری‌ ئێمه‌یه‌. حیزبه‌ سوسیال دێمۆكراته‌كان رێگا چاره‌سه‌ری‌ خۆیان هه‌یه‌‌و ئه‌ویش كه‌ پێوه‌ندیی‌ به‌ هێزه‌ ئیسلامی‌یه‌كان‌و كۆماری‌ ئیسلامی‌یه‌وه‌ هه‌یه‌ تا ئێستا له‌م باره‌وه‌ شیكردنه‌وه‌‌و لێكدانه‌وه‌یه‌ك نه‌بووه‌. ئه‌گه‌ر بتوانین كارێك بكه‌ین كه‌ كۆماری‌ ئیسلامی‌ به‌ جیددی‌ به‌م مه‌سه‌له‌یه‌وه‌ خه‌ریك بێ‌‌و تیئۆریزه‌ی‌ بكا، ئه‌وه‌ بۆخۆی‌ سه‌ركه‌وتنێكی‌ زۆر گه‌وره‌ ده‌بێ‌. له‌ ئیسلام دا، گومانی‌ تێدا نیه‌ كه‌ پێغه‌مبه‌ر، محه‌ممه‌د‌و جێ‌نشینانی‌ رێوشوێنی‌ تایبه‌ت به‌ خۆیان هه‌بووه‌. هیوادارم كه‌ رێژیم مل بۆ ئه‌م جۆره‌ مه‌سه‌لانه‌ رابكێشێ‌‌و له‌ نێوان رێوشوێنه‌ سوننه‌تی‌یه‌كان‌و ئه‌وه‌ی‌ ئێوه‌ داوای‌ ده‌كه‌ن، بتوانێ‌ شتێك له‌ نێو ئه‌و دووانه‌دا بدۆزێته‌وه‌».

قاسملوو: «ئێوه‌ ده‌ڵێن كه‌ له‌ هه‌لومه‌رجی‌ ئێستادا مه‌سه‌له‌ی‌ ئه‌سڵی‌ چاره‌سه‌ری‌ مه‌سه‌له‌ی‌ خودموختاری‌ نیه‌، به‌ڵكوو چاره‌سه‌ری‌ پێوه‌ندیی‌ نێوان حیزبی‌ دێمۆكراتی‌ كوردستانی‌ ئێران‌و كۆماری‌ ئیسلامیی‌ ئێران مه‌به‌ستی‌ ئه‌سڵی‌یه‌. ئێمه‌ هاتووینه‌ ئێره‌ كه‌ داواتان لێ‌ بكه‌ین مه‌سه‌له‌ی‌ خودموختاری‌ چاره‌سه‌ر بكه‌ن».

 دوكتور قاسملوو هه‌وڵ‌ ده‌دا كــه‌ مـــافی‌ دیاریكردنی‌ چاره‌نووس شی‌ بكاته‌وه‌ كه‌ به‌ چه‌ندین شێوه‌ جێبه‌جێ‌ ده‌بێ‌: سه‌ربه‌خۆیی‌، فیدرالیزم یا خودموختاری‌.

له‌ درێژه‌ی‌ قسه‌كانی‌دا ده‌ڵێ‌: «ئه‌وه‌ی‌ بۆ ئێمه‌ مه‌سه‌له‌یه‌ ئه‌وه‌یه‌ كه‌ ئایا كۆماری‌ ئیسلامی‌ به‌ راستی‌ ده‌یه‌وێ‌ كێشه‌ی‌ میللییه‌ته‌كان له‌ ئێران دا چاره‌سه‌ر بكا؟ ئه‌گه‌ر وه‌ڵامی‌ كۆماری‌ ئیسلامی‌ به‌ڵێ‌یه‌، ئێمه‌ ده‌مانه‌وێ‌ بزانین كه‌ ده‌یه‌وێ‌ چۆنی‌ چاره‌سه‌ر بكا؟ ئایا به‌ شێوه‌ی‌ سه‌ربه‌خۆیی‌، فیدرالیزم یا خودموختاری‌؟ ئێمه‌ كورده‌كان لانیكه‌می‌ داخوازه‌كانمان هێناوه‌ته‌ گۆڕێ‌. ئێمه‌ فیدرالیزمیشمان قبووڵه‌، به‌ دڵنیایی‌یه‌وه‌ ده‌ڵێم به‌ بڕوای‌ من به‌و هۆیه‌وه‌ كه‌كاتی‌ خۆی‌ له‌ ئیسلام دا جۆره‌ فیدرالیزمێك هه‌بووه‌ واباشتره‌ كه‌ فیدرالیزم هه‌ڵ‌ببژێردرێ‌و بۆ وێنه‌ یه‌كیه‌تیی‌ كۆماره‌ فیدراڵه‌كانی‌ ئێران پێك بهێنرێ‌. كه‌وابوو ئێوه‌ ئه‌گه‌ر نه‌ سه‌ربه‌خۆییتان قبووڵ‌ بێ‌، نه‌ فیدرالیزم‌و نه‌ خودموختاری‌، ئه‌و به‌و مانایه‌یه‌ كه‌ ناتانه‌وێ‌ مه‌سه‌له‌ی‌ میللییه‌ته‌كان له‌ ئێران دا چاره‌سه‌ر بكه‌ن».

قاسملوو ئه‌و ئاكامه‌ وه‌رده‌گرێ‌ كه‌ : «له‌وانه‌یه‌ سبه‌ینێ‌ به‌شێكی‌ دیكه‌ی‌ ئێران خوازیاری‌ خودموختاری‌ بێ‌. ده‌بێ‌ ئه‌و ئازایه‌تی‌یه‌ هه‌بێ‌‌و به‌ ئوسوول‌و پرینسیپی‌ ئه‌وتۆ، مه‌سه‌له‌ نێوخۆیی‌یه‌كانی‌ ئێران چاره‌سه‌ر بكرێن كه‌ هه‌موو لا قبووڵیان بێ‌. هه‌م عه‌ربه‌كان، هه‌م به‌لووچه‌كان، هه‌م توركمه‌نه‌كان‌و هه‌م كورده‌كان ئه‌گه‌ر له‌مڕۆوه‌ نه‌توانین ئه‌و مه‌سه‌لانه‌ چاره‌سه‌ر بكه‌ین ده‌بن به‌ موسیبه‌تێكی‌ گشتی‌ بۆ وڵاته‌كه‌مان».

پاش چه‌ند قسه‌یه‌كی‌ دیكه‌، ئه‌وان رۆژی‌ داهاتوو بۆ درێژه‌ی‌ وتووێژه‌كان دیاری‌ ده‌كه‌ن. فازڵ‌ ره‌سووڵ‌، كوردی‌ عێراقی‌ كه‌ نه‌خشی‌ نێوبژیوانی‌ هه‌یه‌ له‌ قسه‌كانی‌ هه‌ر دوو لا ئه‌م ئاكامه‌ وه‌رده‌گرێ‌: «یان ئێوه‌ ده‌گه‌نه‌ هێندێك رێككه‌وتن‌و درێژه‌ به‌ وتووێژ ده‌ده‌ن به‌و مه‌رجه‌ی‌ شه‌ڕ رابوه‌ستێ‌، یان بێ‌ ئه‌وه‌ی‌ شه‌ڕ بوه‌ستێ‌، وتووێژه‌كان درێژه‌ پێ‌ده‌ده‌ن. به‌ڵام له‌ هه‌ر حاڵ‌دا باشتره‌ ئه‌مڕۆ كه‌ هه‌لومه‌رج له‌باره‌، بگه‌نه‌ رێككه‌وتن‌و ئاكام، 3 ساڵی‌ دیكه‌، له‌وانه‌یه‌ وه‌زع بگۆڕێ‌‌و موعادیله‌كان‌و هاوسه‌نگیی‌ هێزه‌كان به‌مجۆره‌ نه‌مێنێ‌و هه‌لومه‌رجی‌ ئه‌وكات شتێكی‌ دیكه‌ ببێ‌».

ئه‌وه‌ دوا وشه‌كانن. ده‌نگی‌ جووڵانی‌ كورسی‌‌و مێزه‌كان ده‌بیسرێ‌، پاشان ده‌نگی‌ چوار ته‌قه‌ی‌ كپ كه‌ دیاره‌ به‌ چه‌كی‌ ته‌یار به‌ ئامێری‌ ده‌نگ كپكه‌ر كراون، دێته‌ گۆڕێ‌. ئینجا بێ‌ده‌نگیی‌ ته‌واو.

پوخته‌یه‌ك له‌ ژیانی‌ پڕ به‌رهه‌می‌ دوكتور قاسملوو

عه‌بدولره‌حمان قاسملوو له‌ شه‌و زستان (شه‌وی‌ یه‌لدا) ی‌ ساڵی‌ 1309ی‌ هه‌تاوی‌ رێكه‌وتی‌ 22ی‌ دیسامبری‌ ساڵی‌ 1930 زایینی‌دا له‌ شاری‌ ورمێ‌ له‌ بنه‌ماڵه‌یه‌كی‌ خاوه‌ن مڵكی‌ ده‌ست ڕۆیشتوودا له‌ دایك بوو. خوێندنی‌ سه‌ره‌تایی‌‌و ناوه‌ندی‌، پێشان له‌ ورمێ‌‌و دوایه‌ له‌ تاران ته‌واوكرد. هێشتا زۆر منداڵ‌ بوو كه‌ له‌گه‌ڵ‌ مه‌سه‌له‌ سیاسی‌یه‌كان ئاشنا بوو‌و بیر‌و باوه‌ڕی‌ ئازادیخوازانه‌ له‌ مێشكی‌دا جووڵا. بۆ خۆی‌ له‌م باره‌یه‌وه‌ له‌ كتێبی‌ «چل ساڵ خه‌بات له‌ پێناوی‌ ئازادی‌»دا پاش باسی‌ سه‌فه‌ری‌ 30 كه‌س له‌ كورده‌كان بۆ باكۆ له‌ سه‌ر بانگهێشتنی‌ ده‌وڵه‌تی‌ شووره‌وی‌، ده‌نووسێ‌ :»هه‌ر چه‌ند ئه‌و كاته‌ من ته‌مه‌نم یازده‌ ساڵ‌ بوو، به‌ڵام وه‌ك زۆر منداڵی‌

ئه‌و سه‌رده‌مه‌ سیاسه‌ت سه‌رنجی‌ راكێشا بووم. بابم یه‌كێك له‌ ئه‌ندامانی‌ ئه‌و هه‌یئه‌ته‌ بوو. زۆر باشم له‌ بیره‌ كه‌ له‌ باكۆ هاته‌وه‌ چه‌ندین تاقه‌ندی‌ له‌گه‌ڵ‌ خۆی‌ هێنابوو، تا پڕێكی‌ باشیشی‌ پێ‌ بوو. وادیاره‌ سۆویتی‌یه‌كان قه‌ند‌و تفه‌نگ‌و شتی‌ دیكه‌یان به‌ دیاری‌ دابوو به‌ هه‌موو ئه‌ندامانی‌ هه‌یئه‌ت. قه‌ند به‌ تایبه‌تی‌ زۆر به‌ نرخ بوو، چونكه‌ ئه‌و كاته‌ له‌ ئێران زۆر كه‌م ‌و گران بوو. من ئه‌و كاره‌م زۆر پێ‌ سه‌یر بوو، چونكه‌ له‌ ماڵی‌ ئێمه‌ براكانم ‌و ئامۆزاكانم كه‌ له‌ من گه‌وره‌تر بوون، باسی‌ ئه‌وه‌یان ده‌كرد كه‌بابم له‌گه‌ڵ‌ چه‌ند كه‌سی‌ دیكه‌ چوون بۆ باكۆ حه‌ق‌و ئازادیی‌ كوردان داوا بكه‌ن. بۆیه‌ راست‌و ره‌وان له‌ بابم پرسی‌: ئه‌دی‌ مافی‌ كوردان چی‌ لـێ‌ هات؟»

(چل ساڵ‌ خه‌بات له‌ پێناوی‌ ئازادی‌، چاپی‌ دووهه‌م، 1367 لاپه‌ری‌ 62ـ 61).

عه‌بدولره‌حمان قاسملوو ساڵی‌ 1324 تێكۆشانی‌ سیاسیی‌ خۆی‌ به‌ دامه‌زراندنی‌ یه‌كیه‌تیی‌ لاوانی‌ دێموكرات له‌ شاری‌ ورمێ‌ ده‌ست پی‌ كرد. ساڵی‌ 1325 كۆماری‌ كوردستان له‌ مه‌هاباد رووخا. به‌ دوای‌ ئه‌و دا ئه‌ویش بۆ خوێندن چووه‌ تاران. ساڵی‌ 1327 بۆ درێژه‌ پێدانی‌ خوێندن چوو بۆ پاریس پایته‌ختی‌ فه‌رانسه‌. گه‌یشتنی‌ به‌ پاریس هاوكات بوو له‌گه‌ڵ‌ ته‌قه‌ كردن له‌ شا له‌ زانستگه‌ی‌ تاران (25ی‌ رێبه‌ندانی‌ 1327) كه‌ بوو به‌ هۆی‌ له‌ نێو چوونی‌ ئازادی‌یه‌ دێموكراتی‌یه‌كان له‌ سه‌رانسه‌ری‌ ئێران‌‌‌دا. به‌و بۆنه‌یه‌وه‌ كۆبوونه‌وه‌یه‌كی‌ به‌رینی‌ خوێندكاره‌ ئێرانی‌یه‌كان له‌ پاریس پێك هات كه‌ له‌وێ‌ دا عه‌بدولره‌حمان قاسملوو به‌ درێژی‌ له‌ دژی‌ شا‌و رێژیمه‌كه‌ی‌ قسه‌ی‌ كرد له‌ ئاكام دا خوێندكاران په‌یامێكی‌ ئیعترازییان بۆ حه‌مه‌ ره‌زا شا نارد. ئه‌م كاره‌ بوو به‌ هۆی‌ فشاری‌ باڵیۆزخانه‌ی‌ ئێران له‌ پاریس، ته‌نانه‌ت حكوومه‌تی‌ فه‌رانسه‌ بۆ سه‌ر قاسملوو. سه‌رئه‌نجام ناچار بوو پاریس به‌ جێ‌ بهێڵی‌‌و وه‌ك یه‌كه‌م بوورسیه‌ی‌ ئێرانیی‌ «یه‌كیه‌تیی‌ نێونه‌ته‌وه‌یی‌ خوێندكاران» چوو بۆ پراگ پێته‌ختی‌ چیكوسڵۆواكی‌. هه‌ر له‌و ماوه‌یه‌دا كه‌ له‌ فه‌رانسه‌ بوو، به‌ هاوكاریی‌ چه‌ند خوێندكاری‌ دیكه‌ی‌ كورد»كۆمه‌ڵه‌ی‌ خوێندكارانی‌ كورد له‌ ئورووپا»یان دامه‌زراند.

له‌و ماوه‌یه‌دا كه‌ له‌ پڕاگ خه‌ریكی‌ خوێندن بوو له‌ تێكۆشانی‌ یه‌كیه‌تیی‌ نێونه‌ته‌وه‌یی‌ خوێندكارانیش‌دا به‌شدار بوو. ساڵی‌ 1330 به‌ نوێنه‌رایه‌تیی‌ خوێندكارانی‌ ئێران له‌ دووهه‌م كۆبوونه‌وه‌ی‌ ئه‌م رێكخراوه‌دا كه‌ له‌ شاری‌ پڕاگ گیرا، به‌شدار بوو. هه‌ر له‌و ماوه‌یه‌دا وه‌ك نوێنه‌ری‌ ئێران له‌ زۆر كۆبوونه‌وه‌‌و كۆنفرانسی‌ فیدراسیۆنی‌ جیهانیی‌ لاوان‌دا له‌ شاری‌ بووداپێست پێته‌ختی‌ مه‌جارستان به‌شدار بوو.

ساڵی‌ 1331 له‌ سه‌رده‌می‌ حكوومه‌تی‌ میللیی‌ دوكتور موسه‌دیق‌دا عه‌بدولره‌حمان قاسملوو پاش ئه‌وه‌ی‌ له‌ زانستگه‌ی‌ پڕاگ‌دا لیسانسی‌ زانسته‌ كۆمه‌ڵایه‌تی‌‌و سیاسی‌یه‌كانی‌ وه‌رگرت گه‌ڕایه‌وه‌ ئێران. ئه‌و كاته‌ له‌ نێوان حیزبی‌ دیموكراتی‌ كوردستانی‌ ئێران‌و حیزبی‌ تووده‌ی‌ ئێران دا یه‌كیه‌تیی‌ ته‌شكیلاتی‌ هه‌بوو. قاسملوو پاش شه‌ش مانگ تێكۆشان له‌تاران هاته‌وه‌ مه‌هاباد‌و له‌وێ‌ به‌رپرسایه‌تیی‌ كاری‌ حیزبی‌ به‌ئه‌ستۆ گرت.

پاش كودیتای‌ شوومی‌ 28ی‌ گه‌ڵاوێژی‌ 1332 ناچار بوو به‌ ته‌واوی‌ خۆی‌ بشارێته‌وه‌‌و به‌ نهێنی‌ له‌ تاران ‌و له‌ كوردستان خه‌ریكی‌ كاری‌ حیزبی‌ بێ. له‌و ماوه‌یه‌دا عه‌بدولره‌حمان قاسملوو سه‌رپه‌رستیی‌ رۆژنامه‌ی‌ «كوردستان» ئۆرگانی‌ كۆمیته‌ی‌ ناوه‌ندیی‌ حیزبی‌ به‌ ئه‌ستۆوه‌ بوو كه‌ ته‌نیا پێنج ژماره‌ی‌ به‌ نهێنی‌ لـێ‌ ده‌رچوو. هه‌ر له‌و ماوه‌یه‌ش دا بوو كه‌ كۆمیته‌یه‌كی‌ سه‌رانسه‌ری‌ بۆ كاروباری‌ حیزبی‌ دێموكراتی‌ كوردستانی‌ ئێران به‌ به‌رپرسایه‌تیی‌ ئه‌و پێك هات.

عه‌بدولره‌حمان قاسملوو پاش پێنج ساڵ‌ تێكۆشانی‌ سیاسی‌ له‌ ئێران ‌و به‌تایبه‌تی‌ له‌ كوردستان، ساڵی‌ 1336 جارێكی‌ دیكه‌ چۆوه‌ چیكوسڵۆواكی‌، ساڵی‌ 1337 (1958) پاش سه‌ركه‌وتنی‌ شۆڕشی‌ عێراق ‌و بووژانه‌وه‌ی‌ بزووتنه‌وه‌ی‌ كورد له‌ كوردستانی‌ عێراق قاسملوو له‌گه‌ڵ‌ چه‌ند ئه‌ندامی‌ مه‌سئوولی‌ دیكه‌ی‌ حیزبی‌ هه‌وڵیان دا له‌ رێگای‌ عێراقه‌وه‌ رێكخراوه‌كانی‌ حیزبی‌ زیندوو بكه‌نه‌وه‌. به‌ڵام به‌ هۆی‌ كارشكێنیی‌ هێندێك له‌ به‌ڕێوه‌به‌رانی‌ پارتی‌ دیموكراتی‌ كوردستانی‌ عێراق له‌و كاره‌دا سه‌رنه‌كه‌وتن. ساڵی‌ 1339 عه‌بدولره‌حمان قاسملوو به‌ ده‌ستووری‌ ده‌وڵه‌تی‌ عێراق له‌و ولاته‌ ده‌ركرا‌و گه‌ڕایه‌وه‌ بۆ پڕاگ.

ساڵی‌ 1341 (1962) قاسملوو له‌زانستگه‌ی‌ پڕاگ دوكتورای‌ زانستی‌ ئابووریی‌ وه‌رگرت‌و هه‌تا ساڵی‌ 1349 له‌ زانستگه‌ی‌ پڕاگ ده‌رسی‌ «ئابووریی‌ سه‌رمایه‌داری‌‌و ئابووریی‌ سۆسیالیستی‌‌و تیئۆریی‌ هه‌ڵدانی‌ ئابووری‌» ی‌ گوته‌وه‌. له‌و ماوه‌یه‌دا دوكتور قاسملوو چه‌ندین كتێب‌و نامێلكه‌ی‌ له‌ سه‌ر گیر‌و گرفته‌ ئابووری‌‌و كۆمه‌ڵایه‌تی‌‌و سیاسی‌یه‌كان نووسی‌ كه‌ له‌ هه‌موویان به‌ ناوبانگتر كتێبی‌ «كوردستان‌و كورد»ه‌. ئه‌م كتێبه‌ له‌ جێ‌دا به‌ زمانی‌ چێكی‌ نووسراوه‌، تا ئێستا به‌ زمانه‌كانی‌ ئینگلیسی‌، سڵۆواكی‌، له‌هێستانی‌، عه‌ره‌بی‌‌و كوردی‌‌و فارسی‌‌و هێندی‌وچه‌ند به‌شیشی‌ به‌ فه‌رانسه‌یی‌ چاپ ‌و بڵاو كراوه‌ته‌وه‌. دوكتور قاسملوو زمانه‌كانی‌ كوردی‌، فارسی‌، توركی‌، عه‌ره‌بی‌، فه‌رانسه‌، ئینگلیسی‌، چیكی‌‌و رووسی‌ به‌ باشی‌ ده‌زانی‌‌و به‌ زۆر زمانی‌ دیكه‌ش وه‌ك ئه‌لمانی‌ ‌و زمانه‌كانی‌ سلاو تا راده‌یه‌ك ئاشنا بوو. ساڵی‌ 1349 پاش ده‌رچوونی‌ به‌یاننامه‌ی‌ 11ی‌ مارس‌و رێككه‌وتنی‌ نێوان رێبه‌رایه‌تیی‌ بزووتنه‌وه‌ی‌ كورد له‌كوردستانی‌ عێراق‌و ده‌وڵه‌تی‌ ئه‌و وڵاته‌ ئیمكانی‌ تێكۆشانی‌ سیاسی‌ له‌كوردستانی‌ ئێران زیاتر بوو. له‌و كاته‌دا دوكتور قاسملوو له‌ ئورووپا گه‌ڕایه‌وه‌‌و به‌ هاوكاریی‌ چه‌ند كه‌س له‌ یارانی‌ نیزیكی‌ ئه‌ركی‌ زیندوو كردنه‌وه‌ی‌ رێكخراوه‌كانی‌ حیزبی‌ دێموكراتی‌ به‌ئه‌ستۆ گرت. له‌ كۆنفرانسی‌ سێهه‌می‌ حیزب‌دا كه‌ مانگی‌ جۆزه‌ردانی‌ ساڵی‌ 1350 گیرا، دوكتور قاسملوو به‌ ئه‌ندامی‌ كۆمیته‌ی‌ ناوه‌ندی‌‌و پاشان به‌ سكرتێری‌ گشتیی‌ حیزبی‌ دێموكراتی‌ كوردستان هه‌ڵ‌بژێردرا‌و له‌و كاته‌وه‌ له‌ هه‌موو كۆنگره‌كانی‌ حیزبی‌ دا وه‌ك سكرتێری‌ گشتی‌ هه‌ڵ‌ بژێرایه‌وه‌. به‌م جۆره‌ بۆ ماوه‌ی‌ هه‌ژده‌ ساڵ‌ وه‌ك رێبه‌رێكی‌ كارزان‌و شاره‌زا له‌ پله‌ی‌ یه‌كه‌می‌ مه‌سئوولییه‌ت‌دا كاروباری‌ جیزبی‌ دێموكراتی‌ كوردستانی‌ ئێرانی‌ له‌ یه‌كێك له‌ سه‌ختترین قۆناخه‌كانی‌ خه‌باتی‌ ئه‌م حیزبه‌دا به‌ڕێوه‌برد.

مامۆستای‌ رێبه‌ر دوكتور قاسملوو رۆژی‌ 22ی‌ پووشپه‌ری‌ ساڵی‌1368 (13ی‌ژوئیه‌ی‌1989) له‌ كاتێك‌دا بۆ دۆزینه‌وه‌ی‌ رێگای‌ چاره‌سه‌ری‌ ئاشتیخوازانه‌ی‌ مه‌سه‌له‌ی‌ كورد له‌ ئێران‌دا له‌گه‌ڵ‌ چه‌ند نوێنه‌ری‌ حكوومه‌تی‌ كۆماری‌ ئیسلامی‌ له‌ وییه‌ن له‌ سه‌ر مێزی‌ وتووێژ دانیشتبوو له‌گه‌ڵ‌ هاوڕێی‌ تێكۆشه‌ر كاك عبدالله‌ قادری‌ ئازه‌ر ئه‌ندامی‌ كۆمیته‌ ی‌ناوه‌ندی‌‌و نوێنه‌ری‌ حیزب له‌ ئورووپا به‌ ده‌ستی‌ به‌ ناو نوێنه‌رانی‌ ده‌وڵه‌ت بۆ وتووێژی‌ ئاشتی‌، شه‌هید كرا. له‌و تیروره‌ ناجوانمێرانه‌یه‌دا دوكتور فازل ره‌سووڵ‌ كوردی‌ عێراقیی‌ مامۆستای‌ زانستگه‌ له‌وییه‌نیش هه‌ر به‌ ده‌ستی‌ ئه‌و تیروریستانه‌ شه‌هید بوو.

وه‌رگێڕاو له‌ رۆژنامه‌ی‌ «كوردستان» ژماره‌163، پووشپه‌ری‌ 1369(ژوئیه‌ی‌ 1990)

برچسب‌ها: , , , , ,

پاسخی بگذارید

در پایین مشخصات خود را پر کنید یا برای ورود روی شمایل‌ها کلیک نمایید:

نشان‌وارهٔ وردپرس.کام

شما در حال بیان دیدگاه با حساب کاربری WordPress.com خود هستید. بیرون رفتن / تغییر دادن )

تصویر توییتر

شما در حال بیان دیدگاه با حساب کاربری Twitter خود هستید. بیرون رفتن / تغییر دادن )

عکس فیسبوک

شما در حال بیان دیدگاه با حساب کاربری Facebook خود هستید. بیرون رفتن / تغییر دادن )

عکس گوگل+

شما در حال بیان دیدگاه با حساب کاربری Google+ خود هستید. بیرون رفتن / تغییر دادن )

درحال اتصال به %s


%d وب‌نوشت‌نویس این را دوست دارند: